Kalabira

Gusto ang kadagkoan sa Department of Education nga silotan ang mga kontraktor og school building nga dili dayon makahuman sa ilang proyekto, base sa gidugayon nga gilatid sa kontrata.

Si DepEd-7 Regional Director Juliet Jeruta miingon nga may sumbanan niini nga magsilbing giya aron maghatag og kasiguroan nga ang mga kontraktor motuman gyud sa ilang kontrata. Ang dili makahuman dayon, angay’ng pabayron.

Base sa datus sa DepEd-7, adunay 4,479 ka classrooms ang gipatukod unta sa DepEd-7 sukad niadtong tuig 2016, apan niining maong gidaghanon 329 lang ang nahuman, samtang ang 2,322 wala pa mahuman.

Ang kakuwang sa lugar nga tukuran sa bag-ong classrooms ang nag-unang rason ngano nga wala matukod ang mga bag-ong classrooms. Pero ang kapakyas sa ubang kontraktor pagtuman sa ilang kontrata nakadugang usab sa pagkalangay.

Base sa datus, 400 ka proyekto nga pagtukod og classrooms ang wala pa gayud masugdi, samtang ang pundo sa 56 ka mga proyekto alang unta sa rehiyon-7 ang giuli na lang sa panudlanan sa nasudnong kagamhanan.

Adunay rason nga wala isulti sa DepEd kon nganong wala mahuman sa gikatakdang adlaw ang pagtukod sa ubang bag-ong classrooms building. Nahibaw-an hinoon nga ang pagkuha sa Department of Public Works and Highways og kontraktor nga walay kapasidad sa pagtukod og classroom buildings, usa sa nakaingon sa problema.

Ingon niini ang nahitabo sa pagtukod unta og classroom building sa Barangay Quiot alang unta sa K12 program nga hangtod karon kalabira lang gihapon. Ang classroom building sa Barangay Quiot naobserbahan nga bisan kinsa na lang nga kontraktor ang naghimo niini, apan hangtud karon kalabira lang gihapon.

Ang rason kay walay mga ekipo nga magamit sa pagtukod sa building ang kontraktor. Gawas niini, pila lang pud ka pudyot ang ilang mga trabahante nga nagtrabaho. Akong sugyot sa DepEd, dili kay ang kontraktor lang ang silotan, kon dili, apilon usab ang hingtungdang opisyal sa DPWH.