Kalamboan sa politika

Pwerteng kinataw-anay namo ni Konsehal Joel Garganera diha nga miingon siya nga kon mahitabo man gani nga silang duha si kanhi mayor Mike Rama ug Vice Mayor Edgar Labella, magdungan pagpapili pagka mayor batok ni Mayor Tomas Osmeña, adto na lang siya motambong sa victory party ni Tommy.

Pastilan, lisud kaayo ang kahimtang niadtong mga konsehal nga alyado sa Barug-Team Rama nga suod kaayo sa kanhi mayor kay kon adto sila mosuporta ni Labella, sigurado nga mahiubos kanila si Rama.

Kinsa man kining mao nga mga konsehal nga suod kaayong Rama? Sila mao si Konsehal Edu Rama nga pag-umangkon ni Mike, ug si Konsehal Joy Pesquera nga suod usab kaayo sa kanhi mayor.

Ambot og unsaon kaha nila sa pagkumbinsir si Rama nga aron mosibog na lang sa iyang tinguha nga modagan gyud pagka mayor kontra ni Mayor Osmeña. Dili man sab mahimo nga ingnon nila diretso si Mike nga dili maayong modagan siya pagka mayor kay pilde siyang Tommy.

Kinahanglang mangita gyud sila og paagi kon ngano nga silang Team Rama, adto mosuporta kang Labella. Mahimo tingali nga si Rama maoy suportahan sa Team Rama kon ang kadagkoan sa PDP-Laban maoy mohukom.

* * *

Kon si Rama kaha ang modagan isip bise mayor, kinsa kaha sa BOPK ang makabentaha niya? Sa BOPK, ang posible nga makuha nga ka-tandem ni Osmeña mao ang usa kanila ni Konsehal Dave Tumulak ug Mary Ann delos Santos.

Unsay tan-aw ninyo kon usa kanila ikasangka ni Rama? Buyno, kon ibutang nato nga modaog si Rama pagka bise mayor, unya ibutang usab nato nga makadaog si Tommy, pwerteng gubota kaha sa dakbayan sa Sugbo tungod sa away sa politika.

Pananglit ang modaog nga bise mayor, gikan sa BOPK, unya si Labella maoy makadaog nga mayor, unsa kaha ang mahitabo?

* * *

Pero, ang pangandoy gyud nako mao nga magkauli ra unta sila si Tommy ug Mike, aron moasenso na gyud ang atong siyudad.

Pero, ambot, mora’g dili gyud kini mahitabo. Ang nakanindot gud kay si Tommy maayo og mga plano, maayo mangita’g kuwarta nga magamit sa proyekto, ilabi na gikan sa nasudnong kagamhanan.

Unya, si Rama maayo sa mga proyekto nga mopanindot sa dakbayan, sama sa pagpahiuli sa gidak-on sa atong mga karsada ug ubang proyekto.

Apan kinahanglan nga dili lang gyud usa mangambisyon si Rama nga molabaw siya ni Tommy kay dili ikalimod, senior man gyud niya si Tommy sa politika.