Pag-usik sa salapi

Tinguha sa Philippine Drug Enforcement Agency (PDEA) nga iapil pagpaubos og mandatory drug test ang mga tinun-an sa elementarya nga nagtungha sa Grade IV hangtud sa Grade VI.

Ang laraw sa PDEA mitumaw human nila masayri nga may mga tinun-an na sa elementarya nga nigamit og gidili nga drugas. Gusto nga masayran sa PDEA kon pila na ka mga tinun-an sa elementarya ang tigamitan og gidili nga drugas.

Sigun sa talaan sa Department of Education, moabot sa 14 milyones ka tinun-an ang anaa sa elementarya lukop nasud, ug mokantidad og P200 ang matag kit nga gamiton sa pag-drug test.

Kon imong kuwentahon, mogasto ang kagamhanan og kapin sa P2 bilyones aron ipaubos og drug test ang mga tinun-an sa elementarya.

Ang akong pangutana sa PDEA, kon mogasto og P2 bilyones para lang masayran kon pila na ka tinun-an sa elementarya nga nigamit og gidili nga drugas, may salapi ba kamo para sa mandatory drug test?

Pag-usik lang sa salapi kining nahunahunaan sa PDEA kay dili kini makaserbisyo sa iyang tumong ug tuyo.

Sama pananglit kon nagpositibo ang tinun-an sa paggamit og gidili nga drugas, unsaon man sila sa PDEA?, Dakpon? Isulod sa rehabilitation center?

Kinsa man ang mobayad, ang PDEA? May salapi ba sila para niini?

Kon aduna may salapi ang PDEA, mas maayo pa nga ila kining gamiton sa pagkuha og dugang personnel ug pagbutang og dugang satellite offices sa mga dapit sa nasud aron mahimo silang epektibo sa ilang trabaho.

Gawas nga pag-usik lang sa salapi sa gobiyerno ang nahunahunaan sa PDEA nga mandatory drug test sa mga tinun-an sa elementarya, kwestyonable usab ang legalidad niini tungod kay wa kini gitugot sa Republic Act 9165, ang Comprehensive Dangerous Drugs Act of 2002.