Labing dako nga balikas
Kon wa pa mo makabantay, gianam-anam ni Presidente Rodrigo Duterte pagsukod hangtud asa ta makaagwanta sa iyang mga lihok ug mga sulti.
Tingali nagtuo siya nga mas dako ang kahigayonan nga mapatuman ang kausaban nga iyang gisaad kon paundayonan sa katawhan ang bisan unsa niyang isulti, o buhaton.
Sa sinugdanan, nangayo og pasaylo ang presidente sa iyang mga balikas. Dayon nipasalig nga hingpit nga hunungon kon makabanos na sa Malakanyang. Apan nisamot hinuon.
Ug dihang wa nay nagtagad sa pagprotesta, naputos na sa mga balikas ug mga insulto ang tanan niyang diskurso.
* * *
Sa sinugdanan, nangayo siya og pasaylo sa iyang pagbalikas ni Pope Francis. Dihang nihupas ang mga pagsaway, gibalik niya og balikas, dili lang ang Santo Papa, kon dili, ang uban pa nga mga obispo ug kaparian.
Gihapinan niya sa pagkumpisal nga biktima siya sa pagpanamastamas sa pari sa tinun-an pa siya sa Ateneo de Davao University (AdDU).
Dayon, giadlaw-adlaw na niya sa pagtunglo ang mga pari nga gipasanginlang nangabuso og mga bata ug mga babaye. Gani, nanghatag siya og kopya sa libro nga nagdetalye sa mga pangabuso bugti sa pakighawok sa usa ka babayeng minyo sa South Korea.
* * *
Niadto ra siya nga niwitik pagkuwestiyon kon duna ba gyuy Ginoo. Dihang nitiyabaw ang mga Katoliko, nipasalig siya nga tinuod nga Katoliko ug nga andam nga makigtambayayong sa kadagkoan sa simbahan.
Ang tanang nangaging balikas wa hinuon makaandam sa katawhan sa iyang pagtawag sa Ginoo nga estupido.
Husto si Presidente Duterte nga iyang katungod ang dili pagtuo sa Ginoo sa Simbahang Katoliko. Apan husto sab ang mga obispo nga dili niya kinahanglan nga insultuhon ang mga nituo.
* * *
Husto sab si Presidente Duterte sa iyang pag-insistir nga wa ta’y mahimo sa pagbadlong bisan kinsay iyang balikason ug insultuhon.
Wa tinuod ta’y mahimo pagbaraw sa bisan unsa niyang isulti, o himuon.
Mahimong modeklarar siya og martial law sa tibuok nasud ugma kay inutil sa pagbaraw ang iyang mga itoy nga maoy mayoriya sa Kongreso ug sa Korte Suprema.
Mahimo niyang ipabilanggo ang tanang nangahas sa pagsukwahi sa iyang pamunoan nga way organisadong protesta nga malusad batok sa iyang pagpanggukod.
Ug mao na ang labing dakong balikas sa atong panahon.
* * *
- Latest
