Maayong piyesta Tabuelan

HUNYO 24, 2018: Pangilin sa pagkatawo ni Juan Magbubunyag

Mga Pagbasa: Is. 49;1-6/Sal. 139/Buh. 13;22-26/Lk. 1;57-66,80

Sanglit si San Juan Magbubunyag mao man ang ilang patron, mao nga happy fiesta, ug daghang salamat kaninyong taga Tabuelan gumikan sa inyong makanunayon nga tabang. To find favor with God gyud ang kasinatian kuyog ninyong tanan. Ingon niini man ang kahulogan sa ngalan ni Juan. Iyang giwagtang ang kauwawan nga nasinati sa iyang mga ginikanan sa dihang siya nahimugso. Apan sa laing bahin, nahimong makahuloganon ug puno sa mensahe ang iyang pagtulon-an. Angayan lang nga itisok nato sa atong alimpatakan ug balatian ang kamahinungdanon sa gitawag nila nga kabag-ohan. Kon buot nimo nga mausab ang katilingban, usba daan ang imong kaugalingon, ug kon buot nimong malipay ang kalibutan, isabwag ang kalipay mismo sa imong kaugalingong nataran. Ning pagsaulog nato sa kapistahan, unta mahimong mas mosibaw ang tinguha nga gamiton ang matag takna nga kahigayonan sa kabag-ohan.