Wa na’y gamit si Labra?

Ilegal nga nagyaka sa yuta sa siyudad sa Sugbo diha sa Barangay Kamagayan ang V-Hire terminal nga pasirad-an unta ni Mayor Tomas Osmeña tungod sa duha ka klase sa binuang – pugson nga adto mokaon ang mga drayber sa karenderia sa political supporter sa mayor nga si Douglas Labra ug pagmuntar og tangke sa krudo sulod sa terminal nga walay pagtugot sa gobiyerno.

Sa balita pa, pasirad-an na unta ni Tomas ang terminal. Apan human siya tawaga ni Gobernador Junjun Davide ug gihangyong ipabilin kay nakaserbisyo kini sa iyang mga konstituwente gikan sa nagkalainlaing lungsod sa lalawigan, nausab ang iyang hunahuna.

Ulahing desisyon sa mayor nga pabiling buksan ang terminal apan ipa-ubos na sa pagdumala sa Barangay Mayor’s Office (BMO). Duha ka isyu ang akong gustong tutokan ning kontrobersiyal nga terminal.

Una, nag-atubang na og kaso si Tomas didto sa Office of the President tungod sa pagbukas ning V-hire terminal nga nakalapas sa ordinansa sa dakbayan nga siya ra usab ang nagpirma. Kining maong ordinansa nagdili sa pagbukas og terminal duol sa tunghaan.

Tinuod nga nagkinahanglan kita og V-hire terminal aron maserbisyohan ang mga pasahero gikan sa kalungsoran. Apan dili ba diay mahimong ibutang ang terminal sa lugar nga gitugot sa ordinansa? Nganong lapason man gyud ang ordinansa nga si Tomas ra usab ang nagpirma?

Ikaduha, ang desisyon nga magpabilin ang terminal ug wagtangon lang ang tagdumala nga si Labra, dili makawagtang sa mga binuang diha sa sulod sa terminal. Adunay inpormasyon nga akong nadawat nga adunay gasolinahan sa sulod sa terminal nga walay permiso gikan sa Department of Energy.

Pabor kini nga gihatag ni Tomas ngadto ni Labra nga usa ka loyal nga political supporter. Apan nganong buhian na man niya si Labra? Nakakita na ba siya og laing supporter nga mas magamit ni Tomas sa iyang politikanhong pagkinabuhi?

Kanang BMO nga wala sa lagda sa Local Government Code, nahimo na nga institusyon sa pamunoan ni Tomas. Apan walay imik ang Department of Interior and Local Government. Aw, wala pa man mahuman ang kalibutan. Basin og may makalili niini nga makapasaka og kaso sa local government operations officer sa siyudad sa Sugbo.

Ning nahitabo ni Labra, wala diay kaseguroan ang mga supporters sa mayor kay moabot ra ang higayon nga sama ni Labra, iluwa ra usab sila.     Kay unsa may nahitabo ni Konsehal Gabby Leyson nga unang nagsapupo ni Tomas? Kana si Kapitan Niña Mabatid nga iyang gisandigan niadtong “jobless” siya human mapilde? Si anhing Sammy Darza ug daghan pa?