Estambay

Usa sa mga nakit-an nga paagi sa kapolisan aron mamenosan ang kriminalidad sa nasud, mao ang pagdili na sa mga estambay diha sa kadalanan, labi na panahon sa kagabhion.

Si PNP chief Director General Oscar Albayalde mipasabot nga agi sab ni og pagtuman sa kamandoan ni Presidente Rodrigo Duterte nga limpiyohan ang kadalanan gikan sa mga estambay.

Matud ni Albayalde nga posibleng paagi sa pagpatuman niini mao nga sa unang higayon nga ikaw masakpan, kasaba ra’y imong madawat, apan kon masakpan ka pag-usab mahimo ka na nga pamultahon, o ba kaha pasakaan gyud og kasong “vagrancy.”

Gamay ra hinuon ang silot niining maong kaso apan igo na aron makakaon og tagam ang mga hilig mag-estambay sa kadalanan.

Dunay wala makauyon sa plano sa kapolisan tungod kay alang nila kalapasan ni sa tawhanong katungod.

Alang nila dili angayang pugngan ang usa ka tawo kon gusto niini nga mogawas sa iyang panimalay ug mag-estambay daplin sa kadalanan.

Labi pa gyud niadtong mga dapit nga naghuot ang mga panimalay ug ang karsada mao na ang gihimo nilang nataran.

Alang sa mga wala makauyon niini, usa kuno kini sa mga timailhan sa diktador nga pamunoan.

Gihimo dayon nilang sanglitanan ang estrikto nga pagpatuman sa curfew panahon sa martial law ni kanhi diktador Ferdinand Marcos.

Ambot wala ko makakita sa rason nganong angayan natong supakon ang maong lakang sa kapolisan.

Inay supakon ug sawayon, angayan pa gani nato unta kini nga pasalamatan ug suportahan.

Alang sa mga ginikanan, dako kaayo ni nga tabang pagbadlong sa mga anak nga sutil ug hilig nga mag-estambay sa kadalanan. Gawas pa, alang ni sa kaayohan sa tanan.

Sa imong paggawas sa panimalay aron mag-estambay sa kadalanan nag-imbitar ka sa mga kriminal.

Anaa sab ang risgo nga ikaw maangin kon dunay kagubot nga moulbo diha sa kadalanan.

Duna sa’y mga insidente nga gidakop sa kapolisan kay kuno nalambigit og krimen apan moingon nga igo ra siya nga nag-estambay daplin sa karsada.

Ang ingon niini nga mga insidente malikayan og wala na’y mag-estambay sa kadalanan.

Busa, inay supakon, atong suportahan ang maong programa.