Paghawan sa lapyahan

Gisugdan na sa kagamhanan sa Dakbayan sa Lapu-Lapu ang paghawan sa kabalayan nga anaa mahimutang sa mga lapyahan sa siyudad. Giuna sa pagpangguba ang mga estraktura nga gihimong paabangan, o for rental, ug kadtong mga tangkal sa baboy nga anaa mismo sa dagat gipangtukod.

Sila ang usa sa gitumbok nga hinungdan sa fecal contamination sa kadagatan sa Mactan. Apektado sa clearing operation ang 600 ka kabalayan nga anaa sa three-meter easement sa mga coastal barangays.

Dugay na man unta kining panggub-on sa siyudad apan gilangan lang tungod sa hangyo sa mga apektadong residente nga mosaulog usa sila sa pasko. Apan human sa Christmas, mihangyo na usab nga ipahuman lang una ang mga bata nila nga nagtungha.

Karon dili na mahatag sa siyudad ang hangyo sa mga residente kay nag-atubang na og dakong isyu sa kalikopan ang kadagatan sa Mactan.

Sa findings sa EMB-DENR, bagsak ang kadagatan sa Mactan sa standard sa kalimpyo tungod sa presensya sa fecal coliform.

Apan gipadayag hinoon sa ahensya nga adunay dramatic changes ang resulta gumikan seguro sa subsob nga clean-up drive sa kagamhanan sa Lapu-Lapu. Seryoso ang Lapu-Lapu nga maluwas ang kadagatan gikan sa mas grabe pa unya nga problema sama sa nahitabo sa Boracay.

Dili lang ang paghawan sa mga basura nga anaa sa kadagatan, kon dili, ibton gyud ang gamot, o tinubdan sa water contamination. Daghan gyud ang maapektohan kay mawagtangan man sila og pinuy-anan apan nasayod na sila kaniadto pa lang nga dili sila ang nanag-iya sa luna ug panahon na nga sila mopahawa.

Wala man hinoo’y pagsupak ang mga residente, apan mihangyo sila nga unta naay relocation, o gamay’ng ayuda nga madawat. Ang kagamhanan sa Lapu-Lapu miplantsa na karon sa gitinguhang housing program diin unahon paghatag og pagtagad kadtong naapektohan sa clearing operation.

Kon kanus-a kini mahuman? Aw, atong atangan.