Baligho sa suholan
Sama sa nanglabay nga katuigan, kutob ra gyud sa ulog-ulog ang kantidad sa umento sa suholan nga giaprobahan sa Regional Tripartite Wages and Productivity Board dinhi sa Central Visayas.
Sa P120 nga petisyon sa Associated Labor Unions (ALU) ug P155 nga gipangayong usbaw sa Cebu Labor Coalition, P20 ra ang labing taas nga gihatag sa RTWPB-7.
Alang sa mga trabahante dinhi sa Metro Cebu, P20 ang dugang sa minimum ninyo nga suholan matag-adlaw. Sa ubang dapit gawas sa Metro Cebu, apil na ang mga lalawigan sa Bohol, Negros Oriental, ug Siquijor P15 ra’y umento nga inyong madawat.
Ang mga gagmay nga kompaniya nga duna lay trabahante nga ubos sa napulo, gitugotan nga mohatag lang og umento nga P10 matag-adlaw.
Dili makatawhanon ang maong kantidad. Tungod sa kataas sa inflation rate nga base sa datus sa Bangko Sentral ng Pilipinas niadtong miaging buwan sa Mayo, anaa sa 4.6 porsiento, wa’y kalag ang maong kantidad.
Unsa ba ang imong mapalit sa P20 sa pagkakaron? Ambot giunsa paghunahuna sa mga sakop sa RTWPB-7 ang nakab-ot nila nga kantidad.
Ang labing dakong baligho sa ilang desisyon mao ang kantidad nga gihatag sa ilang counterpart didto sa Western Visayas.
Ang wage board sa maong rehiyon mitugot sab og umento sa sweldo sa samang adlaw nga ang atong RTWPB dinhi sa Central Visayas mipakanaog sa ilang hukom.
Apan mas dako ang kantidad sa umento nga ilang gihatag. Ang Western Visayas mitugot og P41.50, kun subra sa katunga sa kantidad nga giaprobahan sa RTWPB-7.
Nganong niingon ko nga dakong baligho? Kini tungod kay ang Sugbo mas abante tingali kon development ang atong hisgotan kay sa mga dapit didto sa Western Visayas. Apan nganong makahatag sila didto og P41.50 nga umento, samtang dinhi sa ato P20 lang?
Hinoon sa kinatibuk-an, mas gamay gihapon ang ilang minimum nga suholan didto kon itandi dinhi sa ato, apan ang akong punto mao nga unsa may kalainan sa epekto sa inflation didto sa ilang dapit ug dinhi sa ato? Mao ni usa sa labing dako nga inhustisya niining maong sistema.
Alang nako panahon na nga dunay reporma nga buhaton diha sa mga wage board. Pananglitan, did-an ang mga government representatives nga mobotar tungod kay sagad nila tua ka pusta sa mga negosyante.
* * *
- Latest
