Sakpan nga nag-drugs

Pipila pa lang gani ka adlaw gikan sa pag-abli sa klase, may unom na ka tinun-an nga nadakpan kay nag-pot session. Marijuana gyud kuno ang gitabangan og hanggap sa maong mga tinun-an.

Diha ni madakpi sa likud nga bahin sa Cebu City Sports Center (CCSC) ug nasayod na kamo og unsa nga public school ug private school ang anaa dihang dapita.

Ambot kining mga bataa nganong magbinuang pa gyud sila nga gipaeskwela man gani unta sila sa ilang mga ginikanan, nagbinuang pa hinoon. Wala tingali kini mosulod sa ilang klase kagahapon.

Unsa kaha ang angay’ng buhaton niining maong mga tinun-an? Angay ba sila nga tangtangon sa ilang pagka-estudyante? Ang upat dili na menor de-edad, ang duha ra maoy minors.

Kon ako maoy pangutan-on, kon unsay anaa sa balaod, tumanon gyud, gawas sa menor-de-edad nga dili man gyud mapasakaan og kaso. Ang upat ka hingkod na maoy ikiha kay sila gyud maoy nangagni niini nga mag-drugs.

* * *

Kanunay ko nga makabasa og mga balita nga naglambigit ni Special Assistant to the President Bong Go nga mitambong og mga kalihokan sa lainlaing dapit sa nasud.

Nakasabot ko nga ang ubang tambonganan ni Presidente Duterte nga dili na niya maato pag-adto, si Bong Go maoy gipatambong kay siya man maoy special assistant to the president.

Apan dili sab nimo kalikayan nga magduda ang uban nga si Bong Go nagtinguha paglansar sa pagka senador. Bisan gani si Presidente Duterte dili man mobabag nga palansaron si Bong Go pagka senador.

Tinuod man sab nga takus si Bong Go nga mahimong senador, ug nga maayo siya kay dili hambugero. Sa laktud kaduolan nimo kon may ihangyo ka.

Gisaway si Bong Go sa uban kay dunay mga higayon nga nanghatag siya og sapatos sa pagbisita niya sa pipila ka lugar. Ambot nganong gihimo man kini nga isyu sa uban, nga ang kuwarta unta nga gipalit sa sapatos dili man kwarta sa gobiyerno.

Ang pagka suyaon lang gyud ba. Nasuod nako kini si Bong Go kay siya ug si (Mayor) Duterte kaniadtong 2015, gitabangan nila ang akong maguwang nga na-admit sa usa ka ospital sa Davao.

Niadtong higayona, ang akong maguwang dili pa gani botante sa dakbayan sa Davao, apan gitabangan kini nga wala gyu’y gibayran bisan og usa ka sentimo.

Mao kini nga nasuta nako ang kamatinud-anon nila ni Duterte ug Bong Go nga motabang sa katawhang kabus nga ma-admit sa ospital sa kagamhanan. Mao ni ang rason nga gimugna nila ang Malasakit Program.

Karon diay’ng adlawa, birthday ni SAP Bong Go. Happy Birthday sir!