EDITORYAL – Unang adlaw sa klase

Buksan karong adlawa ang klase sa mga pangpublikong eskuylahan, ug sa sunod semana, ang sa mga pribadong tunghaan na usab. Gipaabot ang pagdagsa sa mga estudyante sa unang adlaw ug kini magkinahanglan og dakong pagtagad, dili lang sa DepEd, kon dili, hasta sa mga law enforcement agencies ug sa mga nagdumala sa trapiko.

Excited kaayo karon ang mga ginikanan, hasta ang ilang mga anak, nga karon pa magsugod sa pagtungha. Ang mga responsable ug tarong nga mga ginikanan nasayod unsa ka importante ang edukasyon para sa ilang mga anak. Dako kaayo kini og kahulogan kanila ang pagpakig-uban sa mga bag-o pa nilang gikakita, ug pagsalig ngadto sa mga magtutudlo.

Natural lang kaayo nga adunay mga problemang masugatan nga kinahanglang sulbaron mentras sayo pa. Maayo kaayo nga adunay Brigada Eskwela usa ka semana sa dili pa magsugod ang klase kay naibanan ang ubang mga buluhaton sa mga magtutudlo pagpangandam sa mga tunghaan para sa pagbukas sa klase.

Sa habig sa law enforcement agencies, kinahanglang mag-igmat sila batok sa mga kriminal nga mamiktima sa mga estudyante karong mga panahona. Kinahanglang pasidan-an kanunay sa mga ginikanan ang ilang mga anak kabahin sa lihok sa mga badlongon nga mangigo gyud kon makabenta. Ang presensya sa kapolisan diha sa kadalanan dako na kaayo og matampo sa pagpakgang, o pagpugong niining mahitabong mga krimen. Ang ubang angay’ng bantayan mao ang mga abusado ug mga bentahoso nga mga drayber sa mga jeep pasaheroan nga wa’y kahadlok molapas sa balaod sa trapiko.

Adunay dili motuman sa taripa sa pletihan ug mao pa’y isog kon paninglan og sukli sa mga estudyante ug mga senior citizens nga base sa balaod angay’ng hatagan og 20 posiyento nga diskwento. Sayon ra sila panakpon kon tinud-on lang gyud sa Land Transportation Franchising and Regulatory Board, apan unsaon man, moingon ra man sila nga kuwang ang ilang sakop aron pagpanakop sa mga abusadong drayber. Busa kita na lang ang magpakabana.