EDITORYAL - ‘Trapos’ in action

Wala na gyu’y pagtahod sa kagawasan sa barangay ug sa Sangguniang Kabataan ang tanang mga politiko karon dinhi sa nasud. Kini tungod kay sila pa mismo maoy nagtudlo sa mga batan-on og dili maayo, pinaagi sa paggamit sa ilang mga gahum ug political parties aron mahimong kaalyado ang mga opisyal diha sa barangay.

Kaniadto pa man unta nga gidili sa mga barangay kapitan ug sa mga SK officials ang pag-abin sa mga political parties, ilabi na sa mga local nga partido. Gituyo kini aron nga tinud-anay nilang maserbisyohan ang katawhan sa barangay nga may kagawasan ug wa’y pagpanglubag sa bukton. Ang mga mayor niabuso usab pinaagi sa paglisud-lisod sa mga barangay nga dili nila kaalyado, ug kinahanglang adto gyud manumpa kanila nga daw marka sa pagkahimong kaabin.

Gigamit sa mga mayor ang ilang gahum aron tuk-on ang mga barangay opisyal nga dili nila magawngan pinaagi sa paghikaw bisan na lang sa mga basic services aron sa ingon madaot ang barangay officials ngadto sa ilang mga konstituwente. Kini maoy gihimong mabaw nga rason sa mga barangay officials karon sa ngalan kunohay sa “panerbisyo” nga ilang isakripisyo ang sagradong kagawasan sa barangay, kay kuno unsa may ilang mahimo para sa mga tawong nibotar kanila sa barangay kon wala sila’y pundo ug proyektong mahatag? Mao ba?

Dili ba kaha, ang tinuod mao nga dili gyud mo takus, o wa gyud mo’y abilidad nga modumala sa barangay? Wa na ba gyud sila’y mahimong maayo para sa ilang mga konstituwente kon dili sila motilap sa lapalapa sa mga mayor? Bisan og salikwaot nga magpaitoy-itoy sila sa mga mayor nga naglingkod, o ba kaha kon kinsa ang mayoriya. Mao usab kini ang nahitabo sa mga barangay SK chairmen nga mga nakadaog. Mao kini ang gipangtudlo sa atong mga “Trapo” (traditional politicians) ngadto sa atong kabataan. Ang paglimbong ug paglubag sa katarungan alang sa kaugalingong interes. Dili na ikatingala nga kining mga SK karon, pag-abot sa panahon, mao usab ang mangulo sa pagpanglubag.