Black gold sa Alegria

Pipila ka tuig gikan karon mamahimong sentro dili lang sa Sugbo kon dili lakip na sa tibook nasod ang lungsod sa Alegria.

Kini gumikan sa oil deposit diin gitawag sa uban nga minahan sa itom nga bulawan o black gold.

Bag-ohay lang gipahigayon ang ceremonial valve opening sa Alegria Oilfield nga gitambongan mismo ni Presidente Rodrigo Duterte didto sa barangay Montpeller.

“Dato na ang Alegria” matod sa presidente atubangan sa katawhan sa Alegria atol sa naasoy’ng kalihokan. Dili lang ang Alegria ang madato, kon dili tibuok Sugbo tungod kay ang mga Sugboanon man ang makapahimulos sa kaayohan nga mahatag sa gas production sa Alegria. Una, makahatag kini og liboan ka trabaho sa katawhan nga mao usay makapalihok sa ekonomiya sa dapit.

Matud pa sa presidente nga magsugod na ang migration o ang pagpamalhin sa mga tawo padung sa lungsod sa Alegria ug sa kanait nga mga lungsod.

Gihulagway nga breakthrough sa industriya sa lana sa Pilipinas nga adunay luna nga 197,000 hectares diin 42,749 hectares ang gigahin alang sa oil production.

Karon pa lang pangandaman na sa lokal nga kagamhanan ang dako nga kalamboan gumikan sa dako nga kausaban nga mahitabo sa ilang lungsod.

Sigurado man gyud nga mohugop ang mga tawo kon asa ang oportunidad sa paglambo sa ilang panginabuhi. Dili na kinahanglan molangyaw pa sa mga nasod nga dunay mina sa lana kay anaa naman kini sa lungsod sa Alegria. Mas makaayo usab kini aron mabahin na ang gidaghanon sa katawhan nga kasamtangang naghuot na dinhi sa metropolitan area nga halos wala nay kabutangan.

Kung maayo lang pagkadala sa naasoy’ng proyekto, ang katawhan maoy mabulahan sa minahan sa itom nga bulawan.  Apan kon dili mabantayan basin mahisama sa gas sa Malampaya nga nabulsa sa mga kawatan.