Bag-ong tinudlo sa president
Sugbuanon ang labing una nga gipahibawo ni Presidente Rodrigo Duterte sa iyang pagtudlo sa bag-ong kalihim sa Departamento sa Turismo (DOT).
Nahitabo ni sa Malakanyang niadtong Martes, pila ka oras sa wa pa pormal nga ipahibawo ni Presidential Spokesperson Harry Roque sa media ang pagkatudlo ni Bernadette Romulo-Puyat, puli ni kanhi DOT Secretary Wanda Tulfo-Teo.
Matud ni Puyat nga si kanhi Senador Serge Osmeña III ang unang gisultihan ni Presidente Duterte sa iyang pagbanos sa DOT. Human ni Osmeña, gisultihan sab sa presidente si Special Assistant to the President (SAP) Bong Go.
* * *
Hangtud sa katapusang gutlo, wa mosulti sa tinuod si Teo ngadto sa publiko sa tinuod niyang kahimtang sa gabinete. Hangtud niadtong Martes sa udto, niinsister ang iyang abogado si Ferdinand Topacio nga wa siya mo-resign ug labaw na nga wa taktaka sa katungdanan.
Apan gibuko siya ni Roque human lang sa pipila ka gutlo. Gipahibawo ni Roque nga nisumiter na diay si Teo sa iyang resignation letter ngadto ni Executive Secretary Salvador Medialdea niadto pa’ng Lunes sa hapon, dayong sugod sa sinemana nga tigum sa gabinete.
* * *
Agrikultura ang tuyo ni Puyat pag-adto sa Malakanyang niadtong Martes. Wa mobalibad dihang gitanyagan sa DOT. Masaligon ang presidente nga haum si Puyat human sa 12 ka tuig sa Departamento sa Agrikultura.
Dili ni unang higayon nga gipakalitan ni Presidente Duterte si Puyat og bag-ong trabaho. Pila ka semana ang nilabay, gihusay sa presidente ang away nilang Cabinet Secretary Jun Evasco ug NFA Administrator Jason Aquino pinaagi sa pagtudlo ni Puyat nga tagdumala sa importasyon sa bugas humay.
* * *
Si Puyat nga anak ni kanhi Foreign Affairs Secretary Alberto Romulo nidagan ug napilde pagka kongresista sa Quezon City niadtong 2004 ug nakaalagad na og tulo ka presidente, apil na nilang Gloria Arroyo ug Noynoy Aquino. Wa itago ni Presidente Duterte ang iyang pagdayeg sa kaanyag ni Puyat (nga batan-ong nabyuda dihang giatake sa kasingkasing ang iyang bana, si Atty. David Puyat, samtang nag-football niadtong 2010).
Sa iyang diskurso sa Malakanyang nga gitambongan ni Puyat niadtong Marso 2017, nilikoy ang presidente:
“Berna, nadis-distract ako, you close your legs. National TV ‘no. Nakikinig pa ba ang papa mo?”
* * *
- Latest
