Tambal sa mga kabus

Nalipay ko kay gihatag na gyud sa nasudnong kagamhanan ang P50 milyones nga pundo aron magamit sa Malasakit Program ni Presidente Duterte nga mao ang pagtabang sa mga kabus nga pamilya nga manginahanglan og pag-atiman sa ilang panglawas ug dili makagasto pagpatambal sa mga pribadong tambalanan.

Pinaagi niining mao nga programa, kadtong mga pobre nga manginahanglan nga matambalan sa ilang sakit moadto ra sa Vicente Sotto Memorial Medical Center (VSMMC) aron makapahimus sa medical assistance. Personal nga gitunol ni Secretary Christopher Bong Go, ang special assistant to the president, ang tseke ngadto kang hospital director Gerardo Aquino kaniadtong Martes.

Wala ko magduhaduha pagtuo nga si Presidente Duterte nagpakabana gyud sa kahimtang sa mga kabus nga pamilya nga dili makaabot sa pagpatambal sa mga pribadong tambalanan. Gani, dihang mayor pa si Duterte didto sa Davao pwerteng nindota sa iyang health program, ang Lingap, nga counterpart sa CHAMP dinhi sa siyudad.

Ang nakanindot sa Lingap kay abli kini sulod sa 24 oras ug duna gyu’y opisyal nga magdumala nga makapirma dayon kon may manginahanglan og tambal. Diha nga mayor pa si Duterte kaniadto sa Davao, bisan kaadlawon mokalit lang siya pagtunga didto ug mosusi kon maayo pa ang pagkaatiman sa mga pasyente.

Ang nakanindot sa programa sa Lingap kay mohatag sila og mga tambal bisan dili lumolupyo sa Davao. Mangutana mo nganong suheto kaayo ko niini? Ang akong maguwang nga tua sa Davao City usa sa mga nakabenepisyo sa health program ni Duterte.

Migawas ang akong maguwang gikan sa Southern Philippines Medical Center (SPMC) sa Davao City nga wala gyu’y nabayran bisan usa ka sentimo. Mao na nga diha nga si Bong Go miingon nga gitahasan gyud siya ni Duterte nga superbisahan gyud ang Malasakit Program dinhi sa Sugbo, mituo ko sa iyang gisulti.

Giingnan kuno siya ni Duterte nga dili na lang siya paatubangon pa sa katawhan nga manginahanglan og tabang sa pag-atiman sa ilang panglawas kon dili man siya makatabang kanila. Wala gyud mamakak niini si Bong Go kay nakasinati ko kon unsa nga motabang si Duterte sa mga nanginahanglan.

* * *

Diha nga nasayod ko nga moabot si Bong Go dinhi sa Sugbo kaniadtong Lunes sa gabii, naninguha gyud ko nga magkakita mi. Tuod, wala gyud mapakyas kay nagkahimamat mi ug gipasalamatan nako siya.

Siya man gud ang miadto gyud sa tambalanan ug gipabalhin ang akong maguwang ngadto sa Heart Center kay diha ra man gibutang sa taga SPMC sa emergency room sulod sa tulo ka adlaw.