Pagpaubos sa bayad sa pay parking

Daghang balay patigayon nga ang ilang parking area, imbes ipagamit nga libre sa ilang mga kustomer, gipabayran og mahal. Kana lang IT Park kaniadto, kutob sa moparking daplin sa dalan nga nahisakop sa pay parking zone, pabayron nila og P50 ang kada oras.

Gani, bisan og mohunong lang ka og kadiyot kay naa’y gipaabot, badlongon ka dayon sa mga roving marshall. Bisan sa mga ospital, ang ilang parking area may bayad.

Adunay tag P20, o P25 ang first three hours, diin ang mosunod nga matag oras may dugang P10 nga ipatong. Kon duna kay mahal sa kinabuhi nga na-admit ug imong ubanan didto sa iyang kuwarto tibuok gabii, aw, dako gyud ang imong mabayran sa pagparking.

Luoy ang tagtungod sa pasyente kay nagbaguod na sila sa kamahal sa ilang balayranan sa kuwarto sa tambalanan matag adlaw, sa doctor’s professional fee, mga medisina, laboratory tests, medical procedures ug uban pa, unya makabayad pa gyud og dako sa pagparking. Wala gyud sila’y kaluoy.

Ako mismo, nakasinati sa kabug-at nga nabayran sa pagparking didto sa usa ka medical arts center, diin tungod kay ang akong doktor daghan og pasyente nga magpatambal, nilapas na gyud sa tungang gabii ang akong paghinulat, ug diha pa miabot ang akong turno.

Ug kay sa alas 11 pa man ko sa buntag miparking, aw, dako gyud ang nabayran. Lalim mo ba’y, mora pud og naay metro sa taksi ang ilang parkingan!

Naglibog gyud ko. Dili ba kon ang magpapatigayon moabli og restawran nga dako, gi-require man gyud siya sa gobiyerno nga kinahanglang apilan gyud og parking area aron magamit sa kustomer nga libre?

Sama nianang mga ilado kaayong fast food restaurants sa lainlaing bahin dinhi sa siyudad, ang ilang parkingan libre ug wala’y bayad alang sa ilang mga kustomer. Pero og mga ospital, wala’y libre? Uy, ngano kaha, no?

Maayo gani, kay nakabantay niini si Mayor Tomas Osmena nga ang pay parking area sa mga balay patigayon, komersiyal man, o ospital, giabuso sa mga tag-iya pinaagi sa pag-overprice sa singil.

Tuod man, ang mayor mipagawas og executive order nga ipahunong na ang maong pag-abuso. Gipaus-osan na ang mahal kaayong bayranan sa pagparking, apan ang uban wala pa. Usa ko sa liboan nga nangalipay. Mayor Tommy, salamat ha?

Husto gyud ang lakang karon sa dakbayan nga kadtong mga mall ug dagkong balay patigayon nga nagpabayad sa ilang parking area, pabayron usab og buwag nga business permit sa Cebu City Hall.