EDITORYAL - kaugmaon sa migradwar sa K to 12

Napun-an ang gidaghanon sa mga wala’y trabaho karong tuiga tungod sa mga tinun-an nga bag-o lang nitapos sa kolehiyo ug ang mga unang produkto sa K to 12 educational system. Ang tsirman sa Philippine Business for Education nga si Ramon del Rosario miingon nga kinahanglang maghimo og pamaagi aron madawat dayon sa trabaho ang mga bag-ong graduates sa K to 12.

Ang dakong problema mao ni. Ang mga graduates gani sa kolehiyo maglisud man pagpangita og trabaho tungod kay wala’y eksperyensiya, unsa na lang kaha ang mga gradwado lang sa K to 12? Maayo unta kon ang nakat-onan sa mga gradwado sa K to 12, tukma na sa gipangita sa mga kompaniya ug dili na mangita og work experience ang mga employers. Sagad ra ba sa mga kompaniya karon, lisud sudlon kon wa’y experience ang aplikante, ug mas pa kon dili gradwado og kolehiyo.

Dili ra ba tanang nakatapos sa K to 12 makapadayon sa kolehiyo tungod sa kawad-on. Dili sab tanan kanila mga utokan nga mahimong makakuha og educational grant, o scholarships. Dili tanang trabahoon magkinahanglan og gradwado sa kolehiyo, apan ang nakaparat kay ang ubang kompaniya grabe ra kaayo kataas og gipangita nga educational attainment gikan sa aplikante nga nakatunob gyud sa kolehiyo bisan og ang trabaho saleslady ra, o janitor.

Angay tingali nga maghimo’g balaudnon nga magmando sa tanang kompaniya nga modawat sila og mga bag-ong nakagradwar aron makat-on sila sa trabaho ug makakuha’g work experience, unya pangitaan og paagi aron bansayon ang maong mga tinun-an sa trabaho nga ilang gisudlan. Kon maayo gyud ang aplikante, mahimo man silang i-absorb sa kompaniya, ug niining paagiha, maibanan ang gidaghanon sa mga wa’y trabaho sa nasud ug makapalambo kini sa lokal nga ekonomiya.