Saludo gyud ko ni Konsehal Tony Avila

Daygon nako ang Regional Special Operations Group (RSOG)-7, usa ka special police unit nga anaa magbase sa Camp Sergio Osmeña Sr. kay mihimo sila og operation batok sa illegal swertres diha sa Barangay Kamagayan.

Kaniadtong miaging semana, nadakpan nila ang usa ka tanod nga kabahin sa nagpadagan sa illegal swertres operation sa mao nga barangay nga nabutyag na nga gidumala diay og usa ka opisyal. Bilib ko ni Konsehal Celestino “Tony” Avila kay wala gyud siya maglipud-lipod pagbutyag kon kinsa ang financier sa illegal swertres sa ilang dapit.

Gi-interview si Konsehal Avila sa usa ka sibyaanan kaniadtong Martes sa gabii, ug gibutyag niya nga duha ka opisyal sa ilang barangay ang nagpadagan sa maong illegal nga sugal. Nindot unta kaayo ibutyag, pero wala pa man gud nako makuhai og pamahayag ang hingtungdang mga opisyal.

Apan si Kapitan Raquel Avila angay na gyud nga molihok kay ikaw man ang pangulo sa Barangay Kamagayan. Unya, unsa may gihimo nimo sa usa ka tanod nga nadakpan? Kon wala gani himoon si Kapitan Avila niining illegal swertres operations sa Kamagayan, magduda na ko nga apil ka niini.

Paabuton nato nga ang mga sakop sa RSOG ug Criminal Investigation and Detection Group (CIDG) mohimo og diha-diha nga aksyon batok niining maong sugal nga nahibaw-an na nga gipadagan og mga opisyal. Saludo ko ni Konsehal Tony Avila sa iyang kaisog.

* * *

Nadakpan ang usa ka opisyal sa Bureau of Jail Management and Penology (BJMP) nga giingong nangilkil sa aplikante pagka jail guard. Pastilan no, kon tinuod man gani ni, kamakauuwaw.

Apan matud pa sa among reporter nga si Jail Superintendent Priscillana Lee Gilboy, nga gidakop sa mga sakop sa CIDG, nangilkil gyud sa applicant. Na hala, atubanga ang imong kaso Supt. Gilboy. Wala uroy ka malooy sa mga aplikante no?

* * *

Ang mga fire inspectors no “nagmata ra gyud og buntag.”      Ang gipasabot nako nga molihok lang sila kon may mahitabo na, sama kon ang mga tawo sulod sa building ma-trap kay walay fire escape/exits ang usa ka building.

Susiha ra gud ninyo ang usa ka tindahan duol sa Basilica del Santo Niño nga namaligya og baratohon nga produkto kon may fire exit ba. Nakita nako nga ang ilang fire exit nga gihimo kaniadto dihang nasunog ang ilang branch sa Ormoc, gitabonan na sab.

Kamong mga fire inspectors, lihok mo kanunay, dili kay anha ra sa opisina magpabugnaw unya maayo lang mopasiatab sa mga press release.

Karon, gusto ni Konsehal Jerry Guardo nga ang Office of the Building Officials (OBO) mosusi usab niini.