Mga hasol sa karsada

Nakamugna og grabeng kasahol sa katawhan nga nagbiyahe ang pagsira sa karsada sa lungsod sa Minglanilla niadtong Domingo sa hapon tungod sa pagpahigayon sa Sugat Kabanhawan Festival.

Alas 4:30 sa hapon, gisirad-an ang karsada alang sa street dancing ug giablihan pagbalik alas 6:30 na sa gabii. Apan sulod sa duha ka oras, niabot na sa lungsod sa Sibonga ang kataas sa linya sa mga sakyanan gikan sa habagatan nga mobiyahe unta paingon sa dakbayan sa Sugbo.

Tungod niini nakahunahuna ang mga opisyal sa Kapitolyo nga i-regulate na ang pagpahigayon og street dancing sa mga nasudnong karsada, dili lang sa lungsod sa Minglanilla, kon dili, sa tibuok gyud lalawigan.

Dili lang ang Minglanilla ang naghimo niini, adunay daghang mga siyudad ug lungsod nga mosirado usab sa mga karsada kay mopahigayon sila ug mga kalihokan, sama sa street dancing atol sa kapistahan ug uban pa nga mga espesyal nga okasyon.

Tingali, kaniadto nga gamay pa ang mga sakyanan mahimo ra kini, apan karon nga nagbaha na ang mga sakyanan nga bisan sa probinsya traffic na, angayan na gyud nga dili na tugotan ang mga kalihokan nga makamugna ug road obstruction.

Gawas niini, angayan usab nga did-an na ang pagpahigayon ug haya sa patay sa mga karsada nga okupahon gyud halos ang usa ka lane nga butangan pa ug tent.

Dili lang ang kahuot sa traffic ang mamugna niini, kon dili, delikado usab kaayo sa mga tawo nga mamilar sa haya kay kon dunay sakyanan nga mapalyar, o kaha driver nga magdanghag, na, segurado gyud nga maharos sila.

Laing obstruction ang mga grupo sa banda nga magpatunga gyud sa karsada nga bisan ug walay okasyon mag-parade sila, maayo ra ba og daghan nga ginagmay ra ba.

Bitaw panahon na nga aksyonan kining mga kalihokan nga makamugna og kahasol sa katawhan nga mogamit sa atong kadalanan.