EDITORYAL - Mousab pa mo?

Nag-ambahan pag-adto sa opisina sa CITOM ang mga tag-iya sa mga sakyanan nga na-impound tungod sa pag-counterflow aron nga kuhaon na nila pagbalik ang ilang gikamingawan nga sakyanan. Dul-an sa 100 ka sakyanan, sagad mga motorsiklo, ang nasakpang nag-counterflow sa una nga adlaw paglusad og kampanya kaniadtong Pebrero 5.

May mga motorista nga wala makapugong sa paglugmaw sa ilang mga luha samtang nagtan-aw sa ilang mga sakyanan nga gipangtaya na atol sa usa ka buwan nga pag-impound niini sa CITOM. Gipahinumdoman sila ni Mayor Tomas Osmeña nga dili na gyud moabuso kay kon ma-impound pag-usab ang ilang sakyanan, tanggongon na gyud kini og duha ka buwan.

Dili malalis nga nindot ang tumong sa mayor, nga mao ang kahapsay sa atong kadalanan. Mihapsay man gyud og gamay ang karsada kay naleksyon na man ang mga abusadong motorista nga kaniadto walay kahadlok nga mosubay sa “lane” nga para unta sa mga sakyanan nga ilang ikasugat. Karon, ang mga motorsiklo anaa na mag-agi sa daplin, ug wala na sa tunga sa karsada.

Nagpasabot kini nga ang kagahi og ulo sa mga driver mahumok ra gyud kon adunay lig-on nga mga kamot nga mogunit kanila, ug kini mao ang pagpatuman sa mga traffic enforcer sa balaod, nga dili mahadlok nga ang maong mga motorista sakop ba sa inpluwensyadong hut-ong sa katilingban.

Apan kining nasugdan na nga maayong binuhatan, malagmit nga dili na usab kini kahadlokan sa mga motorista, kon sa paglabay sa mga adlaw, ilang makita nga ang mga traffic enforcer maghinan-aw lang kon adunay mohimo og abuso sa lagda sa pagmaneho’g sakyanan. Kinahanglan nga ang mga enforcer, mohimo gayud sa ilang tahas isip mga tigpatuman sa balaod, ug dili unta sila mahisama sa mga pahoy sa kahumayan nga molihok lang kon kini yugyogon aron mahadlok kanila ang mga langgam.