Good luck sa mga mag-abogado

Gisugdan niadtong Nobiyembre 5 ang unang Domingo, sa upat ka Domingo nga Bar examinations sa University of Santo Tomas (UST) sa Manila.

Mikabat og 7,227 ka gustong mag-abogado sa tibuok nasud ang naglinya sa UST alang sa examinations sa subject nga Political Law sa buntag, ug Labor Law sa pagkahapon.

Karon Domingo, Nobiyembre 12, maoy kombatihon sa mga examinees ang subject nga Civil Law sa buntag ug Taxation sa hapon samtang sa ikatulo nga Domingo mao ang Mercantile/Commercial Law sa buntag ug Criminal Law sa hapon.

Sa katapusang Domingo ning buwana, ang pasulit alang na sa Remedial Law sa buntag ug Legal Ethics sa hapon.

Si Supreme Court Associate Justice Lucas Bersamin, chairman sa 2017 bar examinations, mitug-an nga nagpakatap ang Korte Suprema og pito ka libo ka polis alang sa seguridad sa mga examinees.

Si Justice Bersamin nagkanayon nga ang Bar examinations usa ka official function sa Korte Suprema busa ang mohimo og mga lihok nga makabalda sa kahapsay ug kalinaw sa pasulit masilotan og direct contempt diha-diha dayon.

Tungod niini, giandam sa Korte Suprema ang iyang Justice on Wheels nga bus sa UST aron maoy magsilbi nga Special Trial Court niadtong mga madakpan tungod sa kalapasan nga may kalambigitan sa Bar examination.

Usa ka judge sa Metropolitan Trial Court ang naglingkod nga huwes sa Justice on Wheels nga may gahum sa pagpahamtang og silot nga multa o priso nga napulo ka adlaw sa kasong Direct Contempt niadtong mobalda sa kalihukan.

Gipatuman sa kagamhanan sa Manila ang liquor ban duol sa UST ug ang No Parking sa kadalanan sa España ug Dapitan nga nagpalibot sa UST.

Sa 7,270 nga gustong mokuha sa 2017 Bar examinations, 13 kanila wala tugoti pagsalmot ug laing 30 wala modayon sa pagkuha.

 Sa mga mag-abogado, good luck ug congratulations in advance.