Brgy Labangon, Cebu City

“Kining sa Sitio Sto. Rosario, Salvador Street kay naa may magsugal diha pirme sa giparkingan sa mga sakyanan, adlaw ug gabii. Naa sila’y look-out nga magbantay kon may polis.”

Brgy Tayud, Liloan, Cebu

“Among ireklamo ang mga opisyal namo sa barangay kay ang mga poste diri sa suga gipangkuhaan man nila og socket, ngitngit na hinoon kaayo ang agianan, labi na diri sa Purok Molave, Sitio Lamak. Daghang apektado.”

Brgy Tominjao, Daan-Bantayan, Cebu

“Ireklamo namo kining among silingan nga sige og patukar sa ilang sound system gikan sa buntag hangtud sa gabii, unya pwerte ra ba g’yud kusoga. Dili na mi makapahuway panahon sa udto kay wala may batasan ug wala’y kaikog kining among silingan.”

 Brgy San Vicente (Olango Island), Lapu-Lapu City

“Ang karsada diri sa isla kay gipangguba na pero hangtud karon wala man g’yud ayoha, ingon sila nga sementohon kuno. Pwerte na hinoon nga lisora sa agianan, labi na kon mag-uwan. Ambot unsa’y plano sa engineering nganong gipasagdan ra man.”

Brgy Catarman, Liloan, Cebu

“Nganong ang plitehan sa habal-habal diri gikan sa lungsod padulong sa among barangay mahal man kaayo, hasta sa mga estudyante. Susihon unta kini sa mga opisyal sa lungsod kay luoy kaayo ang mga estudyante nga mahal kaayo ang plitehan.”

Brgy Labogon, Mandaue City

“Naunsa na man intawon kining among basura diri nga wala man kuhaa, mag-usa na ka buwan nga wala g’yud kami makabantay nga may garbage truck nga nangolekta’g basura.  Tagdon unta kini sa mga opisyal namo sa barangay kay ila man kining obligasyon.”

Brgy Tabunok, Talisay City

“Naa man gihapon diri ang mga bata nga mangunguot sa merkado. Wala man gihapon dakpa nga dugay na man namo kini nga gireklamo sa mga polis. Daghan na kaayo kini sila og mga nabiktima.”

Brgy Pusok, Lapu-Lapu City

“ Naa pa man gihapo’y mga namaligya’g shabu diri sa among lugar sir, labi na sa Seawage dapit, may makit-an man gihapon mi nga mamalit og shabu. Hangyo lang unta kami sa mga polis nga hatagan dayon nila kini og aksiyon.”

Brgy Agsungot, Cebu City

“Paita na g’yud sa among karsada diri uy, pwerte na g’yud nga batia, wala na maatiman sa mga opisyal sa among siyudad. Among panghinaoton nga mahatagan dayon kini’g pagtagad sa mga opisyal.”

Brgy Subangdaku, Mandaue City

“Manawagan kami sa taga HUDO nga susihon nila og balik ang Mahiga Creek kay may namalik na man sab nga mga illegal settlers nga mitukod og mga barungbarong kilid sa sapa, nga unta nakadawat na man sila og financial assistance gikan sa siyudad.”

 Alang sa inyong mga reklamo, text lang sa 09083006702 / 09953598138