EDITORYAL - LTO sulod sa mall

Mura’g naibtan og tunok ang mga motorista nga magparehestro sa ilang sakyanan ug mokuha’g driver’s license sa LTO-Mandaue City kay ang opisina niini gibalhin na gikan sa dapit nga kanunay’ng lunopan kon mag-uwan, ngadto sa dapit nga luag ug bugnaw sulod sa JCenter Mall. Imbes nga singoton ang mga motorista nga magpaabot nga ma-release ang ilang lisensya ug rehestro, nindot kaayo ang ilang pamati kay bugnaw man ang dapit.

Ingon gayud unta niini ang buhaton sa mga opisyal sa kagamhanan nga maghuna-huna sila og paagi kon unsaon nga molambo ang gidumala nila nga mga opisina ug ang mga tawo nga mo-transact og business kanila dili masakripisyo. Apan subo kaayo nga palandungon nga daghang opisyal sa kagamhanan, ang gilantaw mao ra ang kaugalingon nila nga kalamboan.

Karon, dili na mahitabo pag-usab nga mag-antos pa sa lunop ug sa abog ang mga tawo nga molukat og driver’s license, ingon man molukat og rehestro sa ilang mga sakyanan diha sa LTO-Mandaue City. Sa dugay’ng katuigan, ang LTO-Mandaue City diha mag-opisina sa Barangay Looc nga dali ra kaayo lunopan kon mag-uwan, ug panahon sa ting-init, ang mga tawo nga moadto sa LTO, mag-antos usab sa abog.

Angay’ng dugangan pa sa LTO ang mga satellite offices diha sa mga dagkong mall aron nga paspas na ang pag-isyu sa mga lisensya ug rehestro ngadto sa mga motorista. Apan nasayran nga adunay mga satellite offices sa LTO diha sa pipila ka mall dinhi sa Sugbo nga wala pa hatagi og “go signal” aron makasugod sa pag-operate.

Hagit kini ngadto ni LTO-7 Regional Director Alita Pulga sa pagpadali sa mga gikinahanglan nga dukomento aron nga ang mao nga mga satellite offices sa LTO makasugod na sa pag-operate ug dili na magpunsisok ang mga motorista, ilabi na sa hagip-ot kaayo nila nga opisina diha sa Natalio Bacalso Avenue.