Brgy Labangon, Cebu City
“Nganong dili man mabadlong kanang nagpataka’g parking diha sa Katipunan street tungod g’yud sa usa ka car service ug kan-anan. Kada adlaw g’yud na magtrapik diha. Unsa man kanang mga tag-iya nianang patigayon diha, dili mabadlong sa taga barangay o sa City Hall?”
Ward 1, Minglanilla, Cebu
“Daghan kaayong salamat nga napublikar ang problema namo diri bahin sa basura kay hangtud karon ang among mga opisyal sa barangay ug sa lungsod wala man magpakabana sa among problema nga dugay na namo nga gireklamo.”
Brgy Bankal, Lapu-Lapu City
“Kaning namaligya’g isda diri sa Sitio Casia nga klaro kaayong kuwang sa timbang ang ilang mga timbangan, luoy kaayo ang mamalitay. Hangyo lang ko kon kinsa nga ahensiya sa gobiyerno ang makasulbad niini.”
Brgy Vito, Minglanilla, Cebu
“Diri sa Sitio Ugoy bati kaayo ang dalan, daghan kaayong mga lubak-lubak unya tangason pa g’yud kaayo lisud makasaka ang mga sakyanan. Wala man g’yuy aksyon ang mga opisyal namo sa barangay bahin niini luoy kaayo ang mga habalhabal ug ang mga pasahero.”
Brgy Sambag 2, Cebu City
“Migamay na g’yud pagsamot ang dalan namo diri sa Sitio Sto. Niño kay gipamutangan man og mga tanom unya naa pa g’yuy refilling station nga nakapasamot kagamay sa agianan kay ang ilang sakyanan naa giparking sa karsada. Kanus-a man moaksyon ang taga CITOM, unya na kon naa na’y sunog?”
Brgy Mactan, Lapu-Lapu City
“Dako g’yud ang akong pasalamat nga imo g’yud gi-publish ang among reklamo bahin sa problema sa illegal drugs diha sa City Jail nga nahimutang sa Soong para makahibawo ang kadagkoan sa BJMP ug sa siyudad nga naa ra sa sulod ang problema sa shabu.”
Brgy Marigondon, Lapu-Lapu City
“Naunsa man ang mga opisyal sa among barangay nga gipasagdan ra man kining kusog nga sugal diha sa may Tonggo Beach, sama sa tong-its ug mahjong. Maayo unta mahatagan dayon kini og aksyon sa kapolisan.”
Brgy Poblacion, Carcar City
“Sige ra man og panghambog ang among mga opisyal diri sa siyudad nga CARCAR IS NICE nga wala man gani makasulbad sa problema sa baha diha sa may merkado nga taga tuhod. Ang maayo nilang buhaton motrabaho dili kay sige’g pamakak sa katawhan bisa’g klaro na kaayo ang ebidensya.”
Brgy Bulacao, Talisay City
“Naunsa na man intawon kining namaligya’g butane diri sa among lugar nga subraan na man sila, halos dili na man lang sudlan ang canister pero mahal kaayo ang ilang baligya. Hinaot nga mahatagan dayon kini’g dinalian nga pagtagad.”
* * *
Alang sa inyong mga reklamo text lang sa 09083006702
- Latest
