Brgy Canjulao, Lapu-Lapu City

“Panawagan namo sa taga CTMS ug mga opisyal sa barangay nga susihon kining sa Purok Caimito kay daghan kaayong nag-parking nga mga sakyanan sa karsada. Gihimo na man hinoon nga grahean ang karsada.”

Brgy Anonang Sur, Bogo City

“Ang karsada intawon namo diri pwerte na kaguba, maglisod na og agi ang among mga sakyanan. May budget na man unta para niini pero ngano nga wala pa man ipasemento.”

Ward 1, Minglanilla, Cebu

“ Naunsa na man intawon kining among lugar nga gihimo man nga labayanan sa mga basura. Moreklamo na ang mga tawo nga moagi diri sa among lugar kay baho kaayo.”

Brgy Antipolo, Tuburan, Cebu

“ Mamalihug lang kami sa pagdukol sa mga opisyal namo sa barangay kay nagpakabuta-bungol ra man sila sa problema namo sa karsada, diri wala g’yud maatiman. Sige ra sila’g dawat sa ilang mga sweldo nga wa’y mga nahimo.”

 Brgy Lipata, Minglanilla, Cebu

“ Naay nadestino diri nga traffic enforcer isog man kaayo, sige ra man og paningka sa mga driver. Maayo unta og mabadlong kining tawhana.”

Brgy Cogon, Bogo City

“Naay usa ka establisemento diri nga gagmay kaayo’g sweldo sa iyang mga trabahante, tag P180 ra ang matag adlaw, unya isog pa g’yud kaayo. Sige siya’g hulga nga ipa-drug test kaming mga trabahante pero wala makabadlong sa iyang pag-umangkon nga adis-adis.”

Brgy Mariveles, Dauis, Bohol

“Ang mga polis namo diri wala may gihimo aron dakpon ang mga mamaligya og shabu, wala g’yud sila makadakop sukad sa paglingkod ni Duterte.”

Brgy Mactan, Lapu-Lapu City

“ Manawagan ko sa kadagkoan sa kapolisan ug sa BJMP nga mohimo’g surprise drugtest sulod sa City Jail nga nahimutang sa Soong kay  among nahibaw-an nga naa diha sa sulod ang daghang supply sa shabu.”

Brgy Hagnaya, San Remigio, Cebu

“Asa na man kami mosumbong nga wala na ma’y mga polis nga magpakabana sa problema sa ilegal nga drugas. Makaduda na man hinoon nga naa g’yuy mga polis diri nga nagpaluyo niining ubang mga pusher.”

Brgy Tanday, Baclayon, Bohol

“Kanus-a man intawon trabahoon ang gubaon namong karsada diri, peligro kaayo sa mga sakyanan nga moagi, labi na kon padulong na og tungas. Pulos ra man pasalig ang mga opisyal namo sa lungsod bahin niini, pero hangtud karon wa’y gihimo.”

Brgy Pit-os, Cebu City

“Naay ilado nga pusher diri, suki sa mga tigpalit, labi na diri sa gitawag nga Sitio Binaliw kay kon mopalit ka og usa ka pakete, naa’y pakapin usa ka syringe. Palihug intawon sa pagpa-surveillance diri sa among lugar para madakpan na kining mga tawhana.”

Alang sa inyong mga reklamo text lang sa 09083006702