Brgy. Ticad, bantayan, cebu “Grabe

“Grabe na man lang gyud ka estrikto sa mga in-charge sa traffic diri kay sige ra man sila’g panakop sa mga motor wala man maluoy sa mga tawo diri kay grabi kadagko sa multa. Gihatagan unta nila’g chance ang mga tawo nga makalukat og lisensya ug makaparehistro sa ilang mga motor.”

Brgy. Alang-Alang, Mandaue City

“Kining Sitio Abra sir kay mibalik na sab pagpundo ang mga tubig kun mag-uwan bisag hinay ra. Nasulbad na man unta kini sa una pero mibalik na ‘sab karon ang pagpundo sa tubig, maayo unta’g maatiman kining problemaha.”

Brgy Canjulao, Lapu-Lapu City

“Nganong hangtod karon wala man gihapon masulbad ang problema sa sugal diri sa amoa kusog gihapon ang illegal swertres kay hastang ubang mga nagtrabaho sa barangay apil man sa nagpataya niining klase sa sugal.”

Brgy Agsungot, Cebu City

“Kining among karsada diri wala gyud kini klaro pag-atiman lisod kaayong kaagian tungod sa kabati ug kalisod. Hangyo kami sa mga opisyal sa siyudad nga mahatagan unta dayon og kasulbaran ang among problema.”

Brgy Cotcot, Liloan, Cebu

“Akong hangyo sa mga polis namo diri sa lungsod kay dili man sila patas sa ilang mga imbestigasyon mura man sila’g mopabor sa pikas labi na kun ilang kaila. Maayo unta’g mapakgang kini sa kadagkuan sa kapolisan sa probinsya.”

Brgy Poblacion, Compostela, Cebu

“Daghan kaayong mga motor diri nga way mga suga nga mobiyahi bisag gabii nang dako hapit gud kami madisgrasya kay naay among nasugatan nga motor duha ka buok nga way mga suga. Mas maayo madakpan na kining mga tawhana kay makaamong kini sila sa ubang tawo.

Brgy Kinasang-An, Cebu City

“Naa pa man gihapon diri mga namaligya’g shabu sa among barangay mga hawod kaayo wa gyud mahadlok sa ilang gihimo. Nagsalig lang kini sila kay mga ex-convict dili mahadlok nga madakpan pagbalik sa mga polis.”
Brgy Casili, Consolacion, Cebu

“Naunsa na man kining karsada sulod sa Hilltop nga gialihan man hinoon ang karsada og culvert kuyaw kaayo sa moaging mga sakyanan kay wa ra ba gyud gibutang nga karatola nga naay giali aron makabantay unta ang mga motorista.”

Brgy Sto Niño, Cebu City

“Nganong dali na man kaayo mabahaan ang downtown area diri sa siyudad bisag dili kaayo kusog ang uwan. Unsa may gibuhat sa mga opisyal namo diri sa siyudad nga wala man molihok para masulbad ang problema.”

Brgy Jaclupan, Talisay City

“Hapit gyud ko madisgrasya diha sa may Campo 3 kay gamay na lang kaayo ang agianan tungod sa mga giparking nga sakyanan kilid sa karsada. Gihimong grahian sa ubang mga tawo ang kilid sa karsada pikas ug pikas maong gamay na lang ang agianan.”

Brgy Pasil, Cebu City

“Naa pa gihapoy daghang video karrera machine nga naa diri sa among lugar wala pa gyud ni madakpi sa mga polis. Sige’g panghambog ang nag -operate sa karera nga dili sila dakpon nga naa siyay amigong mga polis.”

Alang sa inyong mga reklamo text lang sa 09083006702