Momho ra ang nadawat

Basta malambigit na gani ang kuwarta, makamugna gyud kini og kontrobersiya, sama sa nahitabo sa patong nga salapi sa ulo sa mga bandidong Abu Sayyaf didto sa Bohol. Tataw man kaayo ang gipamulong ni Presidente Duterte nga adunay patong nga P1 million ang matag ulo sa mga bandido. Tuod man, napatay ang Bol-anong si Joselito Melloria ug laing tulo niya ka kauban sa operasyon sa mga tropa sa kagamhanan.

Natultolan nila ang nahimutangan sa mga ASG pinaagi sa kasayuran nga gihatag sa ilang mga informant, ilabi na kadtong usa ka habal-habal driver nga maoy nasakyan sa bandido. Tungod lagi kay napublikar man ang reward money, nagtuo ang tanan, ilabi na ang mga silingan sa habal-habal driver nga milyonaryo na siya. Siyempre, daghan gyud kaayo ang mangayo og “balato” apan P450 mil ra man ang iyang nadawat.

Matud ni Bohol Gov. Edgar Chatto nga ang P1 million nga ganti nga gibahin-bahin sa pipila ka informer, apil ang drayber sa habal-habal, para lang sa paghatag og inpormasyon nga misangpot sa pagkapatay ni Melloria, kay ang pagkapatay sa laing tulo ka bandido trabaho na kadto sa militar. Pastilan pagkamabaw kaayo sa ilang palusot. Nilampos sila sa pag-neutralize sa tulo ka laing kauban ni Melloria tungod sa kasayuran nga ilang nadawat gikan sa drayber sa habal-habal.

Lakip sa uban pa nga mga tawo nga nakatampo sa malampusong operasyon, matud pa nga miabot og P1 million ang nahatag nga maoy gibahin. Asa na man ang nahibiling P3 million? Klaro kaayo nga gipangitaan ra nila og rason ang ilang gihimo tungod kay natribukar na man ang ilang tinonto.

Sa paghatag pa lang sa reward money, dili sila transparent kay gidid-an ang media sa pag-cover. Gusto man nila nga isekreto, apan dali ra kaayo nabisto ang garapal nilang tinonto. Ang naasoy’ng kantidad wala pangayoa sa mga tawo, kun dili, gitanyag kini ngadto kanila ug angayan lang ihatag kay mao man kini ang gisaad sa presidente.

Kinabuhi sa mga informant ug sa ilang pamilya ang nabutang sa peligro, unya momho lang ang ilang nadawat. Kun P1 million ra ang gibahin-bahin sa mga informant, kinsa man ang nagbulsa sa P3 million?