Ang qualification ni Gina Lopez

Usa sa mga rason ngano nga gisalikway ang appointment ni Gina Lopez pagka-kalihim sa DENR mao nga dili kuno siya kwalipikado.

Atong higalang columnist sa The Freeman, si  Atty. Josephus Jimenez, nangutana nga kun ang usa ka boksidor ug usa ka basketball player, qualified nga mahimong senador, ngano nga dili man mo-qualify si Gina Lopez nga masakop sa Cabinet?

Kun si Senador Blas Ople, usa ka college dropout, nahimo nga labing bantugan nga DOLE ug DFA secretary, in fact, “the greatest  DOLE secretary and one of the best DFA secretaries we ever had,”  ngano nga dili man qualified si Lopez paghupot sa katungdanan pagka-DENR secretary?

Laing dropout, is Erap, karon mayor sa Manila, na-presidente sa tibuok nasud, nganong dili man mo-qualify si Lopez pagka-secretary?

Mga pangutana nga wala na’y kapuslanan, dili na kinahanglan tubagon pa kay tapus na ang tanan, mihukom na ang mga gamhanan ug honorable nga mga sakop sa Commission on Appointments.

Alang kanila, wala’y nahimong kadaot batok sa environment ang mining industry. Mga responsible miners kini sila. Atong ma-imagine sa kadako sa trabaho ug kaakohan sa mopuli ni Lopez, pag-undo what Lopez has done, nga kinahanglan mo-toe-the line sila sa kagustohan sa mga miners.

Matud ni Jimenez, ang mga environmentalists igo lang mangutana, “why do good guys always lose in the game of politics and dirty business?”

* * *

Nagmalampuson ang maiden test flight sa China sa una nilang made-in-China nga passenger jet plane, mokarga og 168 ka pasahero, ug gama sa state-owned nga aerospace manufacturer ang Commercial Aircraft Corporation of China (COMAC).

Katumanan kini sa dugay na nila nga gilaraw ug gidamgo nga maka-compete sila uban sa mga dagkong tiggama sa mga eroplano sa kalibutan.     Matud sa International Air Transport Association, ang China maka-compete sa Airbus ug Boeing sa ilang pagpanggama og eroplano,

Karon, aduna sila’y mga bullet train ug magpalupad na pud unya sila sa mga flying taxi.

Ngilngiga sa China no? Samtang kita dinhi, unsa man? Habalhabal.

* * *

Ang trabaho sa P50 bilyones, 74 kilometro nga Metro Cebu super expressway sugdan karong sunod tuig. Giisip nga labing dako nga infra project sa Sugbo. Ang maong expressway motadlas, kasagaran sa kabukiran ug kabungtoran, mo-connect sa mga dakbayan sa Naga ug Danao. Matud ni Sec. Mark Villar sa DPWH, the golden age of infrastructure is now happening.

Ug napiksan kita dinhi sa Sugbo, tungod kay “mahal na mahal ni Presidente Duterte ang Cebu,” matud ni Villar.