Kinsa ang namilyonaryo

Nadawat na sa habal-habal driver niadtong miaging semana ang ganti nga salapi nga gisaad ni Presidente Rodrigo Duterte niadtong makatug-an sa gitagoan sa teroristang Abu Sayyaf nga nangabot sa lalawigan sa Bohol.

Apan imbes kay malipay, naproblema na hinoon ug nakuyawan sa iyang kinabuhi ang habal-habal driver tungod sa kadaghan sa mga tawo nga nagpanon ngadto sa iyang panimalay kay nangayo og balato sa pagtuo nga milyones ang nadawat niyang ganti gikan sa mga opisyal sa kapolisan ug militar.

Sigun sa resibo nga gipakita sa habal-habal driver ngadto sa mga tawo nga nagpanon sa iyang panimalay P450 mil lang ang iyang nadawat gikan sa mga opisyal sa militar ug kapolisan, ug dili usa ka milyon. 

Ang mga tawo nagtuo nga namilyonaryo na ang habal-habal driver tungod kay tagsa ka milyon man ang patong sa ulo sa kada Abu Sayyaf nga madakpan o napatay. Upat ang napatay sa pinusilay didto sa Clarin human natultolan ang ilang gitagoan pinaagi sa kasayuran gikan sa habal-habal driver.

Busa P4 milyones unta ang madawat sa habal-habal driver. Pero nganong P450 mil ra man ang gihatag kaniya? Asa man diay ang uban nga ganti? Sigun sa balita wala pasudla ang mga sakop sa media dihang gitunol sa mga opisyal sa kapolisan ug militar ang ganti nga salapi sa habal-habal driver.

Kini maoy rason nga nagduda na hinoon ko nga nagbinuang ang mga opisyal sa kapolisan ug militar sa ganti nga salapi. Nangayo ba og bahin ang mga opisyal sa ganti nga salapi? Ibutang ta nga nangayo sila og bahin pero pagkadako ba pud sa ilang gipangayo. Mas dako pa man sa nagtug-an sa gitagoan sa Abu Sayyaf?

Pero sayod kita nga ang mga opisyal sa kapolisan ug militar wala gyuy labot sa ganti nga salapi, busa ang ilang gihimo kun ugaling nangayo sila og bahin, usa ka dakong sayop.