Disiplina ang kinahanglan

Maayo gani kay diha nga natagak ang usa ka container van didto sa Magallanes Street gikan sa trailer nga gikargahan niini, walay tawo o sakyanan nga natagakan. Kun may natagakan pa, sigurado nga malata tungod sa kabug-at sa container van.

Makadaghan na gyud ko makakita nga adunay mga container van nga gikarga og trailer unya giguroy og prime mover, nga wala gi-lock ang van ngadto sa trailer. Tungod niini, mahimo nga inig-untol sa trailer, mahulog ang container van nga igo lang gipatong.

Wala ko magpasabot nga mao kini ang gihimo sa mga nagkarga sa maong container van. Apan makapangutana ko kun ngano nga natagak man ang maong container. Kun gi-lock pa kini ngadto sa trailer, maapil unta katumba ang trailer uban sa van?

Higayon na tingali nga ang mga traffic enforcers ug ahente sa Land Transportation Office (LTO) mohimo og inspection sa mga nagkarga og container van. Dunay lagda nga ang mga drayber nga nagdinanghag lang ug wala mosiguro nga gi-lock gyud ang ilang gikarga nga van, masilotan tungod sa “unsafe cargoes.”

* * *

Pagka saba gyud sa mga tawo nga mikuwestyon mahitungod sa pagkamatay niadtong laing sakop sa Abu Sayyaf didto sa Bohol. Unsa may inyong gusto nga buhion pa ang maong sakop sa bandidong grupo? Wala pa diay kamo malipay nga napatay ni sa kapolisan?

Dili kaha kadtong maong sakop sa Abu Sayyaf maoy kusog kaayong mamunggot og liog sa mga madakpan nila nga langyaw didto sa Basilan ug ubang mga dapit sa Sulu? Ang tumong sa pag-anhi sa maong mga Abu Sayyaf sa Sugbo mao ra gyud ang paghimo’g kagubot.

Ang malinawon nato nga lugar dinhi sa Kabisay-an, gusto nila nga gubton ug ipareho sa nahitabo didto sa Sulu ug Basilan nga magkurog ang katawhan kanila nga mga sakop sa Abu Sayyaf.

Gidayeg nako ang mga igsuon nato nga Bol-anon nga nagmabinantayon sila batok sa mga dautang elemento nga buot mogubot sa ilang dapit. Ingon usab unta niini ang pagpakabana sa mga Sugbuanon.

* * *

Drayber ka gani sa mga sakyanan sa gobiyerno, dili ka gyud moabuso kay daghang mga mata ang nagbantay ninyo. Sama sa usa ka drayber sa L300 Van sa City Hall nga mipugos gyud sa paghimo og left turn sa karsada nga busy kaayo. Sa iyang gihimo, nakapasamot kini og kaproblema sa trapiko. Dunay nakahatag og hulagway ni Mayor Tomas Osmeña sa gihimo sa maong drayber ug diha-diha gipasalig sa mayor nga iyang taktakon sa trabaho ang maong City Hall employee. Angay lang.