Misaka ang kalidad

Halos dili katuo ang tanan sa migawas nga resulta sa Bar examinations sa niaging adlaw nga nagpakita nga kadaghanan sa mga anaa sa Top 10, gikan sa mga eskuwelahan sa Kabisayaan, ilabi na sa dakbayan sa Sugbo ug Dumaguete.

Kinsa ba ang makatuo nga gawas usab niana, numero uno sa mga mi-top ang usa sa migradwar gikan sa University of San Carlos. Usa siya ka certified public accountant kinsa nagtinguha nga mahimong usa ka abogada.

Apan ang labing nakapatay-og sa tanan mao ang reyalidad nga wala’y bisan usa sa mga nag-unang tulonghaan nga nagbase sa kaulohan ang nitugpa sa sulod sa Top 10 sa mao nga exam. Pulos gawas sa Metro Manila ang mibida nga mga eskuwelahan.

Kining maong kalamboan nagpasabot lang nga nausab na ang trend sa edukasyon karong panahona, nga dili na kinahanglan nga moadto pa ang usa ka tinun-an sa kaulohan aron lang pagkab-ot og maayong kalidad sa edukasyon.

Sa unang panahon, dako kaayo ang bentaha kun adto na gani mo-eskuwela didto sa kaulohan. Kini tungod lagi sa rason nga dili hibentahaan ang mga tunghaan didto sama sa Ateneo, La Salle, Santo Tomas ug ang University of the Philippines.

Mao gani nga kadto lang mga anak og adunahan sa probinsiya ang makasulod niining maong mga tunghaan. Kini gumikan usab sa ka mahal sa tuition fee ug sa ubang gastohan. Hinuon sulit man usab tungod kay de kalidad kining maong mga tunghaan.

Apan nausab na ang panahon karon. Miarangkada na ang mga tunghaan sa mga lalawigan, diin daghan kanila ang nanguna na sa mga nagkalainlaing eksaminasyon. Sa ato pa mi-level up na ang mga taga probinsiya.

Hinuon dili na usab ikatingala pa ang resulta sa Bar Examinations. Daghang estudyante gikan sa probinsiya  ang mi-top usab sa ubang mga kurso, ug nagpasabot lang kini nga miasenso na usab ang mga tunghaan sa mga lalawigan kun ang kalidad maoy hisgotan.