May gipanalipdan ba si Tomas?

Gipa-blotter na ni Santa Fe Mayor Jose “Titing” Esgana ang giingong pagpanghulga ni Mayor Tomas Osmeña kaniya kaniadtong Sabado sa buntag, Abril 29.

Si Mayor Osmeña higala diay kini sa magpapatigayon nga si Alex Tan nga nanag-iya og mga barko nga magbiyahean sa isla sa Bantayan. Si Tan ang nagpaila ni Mayor Osmeña ngadto kang Esgana nga miresulta sa giingong pagpanghulga.

Daan na nga dili maayo og relasyon ni Esgana ug Tan tungod kay ang naulahi maoy hinungdan nganong gisuspenso sa katungdanan sa Ombudsman si Esgana. Ning bag-o gusto ni Esgana nga imbestigahan sa buhatan sa Bureau of Internal Revenue si Tan tungod kay matud pa wala kini mobayad sa tukmang buhis sa iyang lungsod.

Si Mayor Osmeña nanggukod kunohay sa Banco De Oro ug wala mohatag og business permit niini tungod kay iyang gihulagway nga tax evader, o wala mobayad og tukmang buhis sa dakbayan sa Sugbo.

Pero ngano nga daw sama man sa gipanalipdan ni Mayor Osmeña ang magpapatigayon nga si Tan nga gikabangi ang lokal nga opisyal sa lungsod sa Santa Fe tungod kay wa pud kini mobayad sa tukmang buhis sa lungsod? Inconsistent si Tomas.

Mao ni ganahan sa mga badlungon ngadto kang Mayor Osmeña kay bisan pa sa ilang pagkabadlungon panalipdan gayud sila sa mayor basta iya silang higala. Kamatuoran nato niini ang nagpadagan sa V-Hire Terminal sa Barangay Kamagayan, gipanalipdan ni Mayor Osmeña bisan pa man og ilegal ang operasyon sa terminal.

Laing kamatuoran mao ang pagpanalipod ni Osmeña ngadto sa magpapatigayon nga si Alex Tan. Sa hitabo, si Mayor Osmeña ang nasuko kang Esgana, pero ang mayor sa Santa Fe pa ang iyang gipasanginlan nga bully. Porbida sa?