Kampanya batok kurapsyon

Gitinuod gayud ni Presidente Rodrigo Duterte ang iyang bahad paglimpiyo sa kagamhanan gikan niadtong mga corrupt nga mga opisyales. Sukad sa iyang paglingkod sa pwesto, pipila na ka mga  opisyal ang iyang gipalagpot.

Sa niaging mga adlaw, midominar sa mga pamantalaan, telebisyon, radio ug sa social media ang pagsipa gikan sa puwesto ni Department of Interior and Local Government Secretary Ismael Sueno ni Duterte tungod sa mga akusasyon sa corruption.

Si Sueno maoy labing dako nga opisyal sa administrasyong Duterte ang nahawa  sa puwesto tungod sa corruption. Nauna nang mi-resign si National Irrigation Authority administrator Pete Laviña tungod kuno sa mga kahiwian nga iyang gikalambigitan sa maong buhatan.

Kining maong mga kalamboan nagpakita lamang nga seryoso gayud ang Presidente sa iyang kampanya batok sa graft and corruption sa kagamhanan. Hinuon usa kini sa iyang saad panahon sa kampanya niadtong eleksiyon sa niaging tuig.

Dili ikalimod nga magsilbi kining maong kalamboan nga leksiyon niadtong padayong nalambigit sa mga kahiwian diha sa mga buhatan sa kagamhanan. Nga sa dili madugay matokhang gayud sila niining nagkainit nga kampanya sa kagamhanan.

Hinuon maayo kining gipahugtan nga kampanya batok sa corruption sa kagamhanan. Kini aron nga makita usab sa katawhan nga ang kasamtangang administrasyon dili lamang kugi sa paggukod niadtong mga drug pusher ug dealer.

Liboan na ang nahay-ad sa dakong kampanya sa kagamhanan sa negosyo sa ilegal nga druga. Ug miani kini og mga pagbatikos gikan sa mga nagkalainlaing sektor tungod kay morag nalimtan na kuno niini pag-atiman sa ekonomiya sa nasud.

Mipakpak kita sa kampanya sa kagamhanan batok sa negosyo sa druga. Apan aduna pay daghan nga mga problema ang angay nga atimanon. Kini sama sa paggukod gayud niadtong mga buaya nga nagluklok sa mga nagkalainlaing buhatan.