Panahon dili na kakompiyansahan

Niadtong Lunes sa buntag, natanggong ko og kapin duha ka oras sa traffic habig sa dakbayan sa Lapu-Lapu sa pagpaingon unta nako sa akong trabahoan sa Dakbayan sa Sugbo. Wala gyud moirog ang mga sakyanan nga taas na kaayo ang linya.

Walay kapilian, tungod kay parehong walay kalutsan ang mga sakyanan. Tungod kay duna man ko’y assignment nga giapas sa ASEAN meeting, wala na lang ko moadto sa estasyon sa GMA ug mideretso na lang ko sa venue sa akong assignment nga natunong ra usab nga didto gihimo sa Lapu-Lapu City.

Sumala sa City Traffic Management Service nga wala’y sabod sa habig sa siyudad sa Lapu-Lapu City ug ang traffic naggumikan sa grabeng baha didto sa Dakbayan sa Mandaue nga nahimong mura’g dagat ang atubangan sa UC-LM ug daghang sakyanan ang napagngan og makina dihang misungasong sa baha.

Didto usab sa UN Avenue, habig sa Marcelo Fernan Bridge gisanapan usab sa baha. Pastilan kinsa’y magdahom nga taliwala sa panahon sa ting- init masinati ba diay gihapon ang baha? Kumpiyansa ra usab kaayo ang tanan, ilabi na seguro ang mga local government units. Kumusta man diay ang drainage system sa Mandaue?

In fairness sa Mandaue City, giestrikto nila ang pagpatuman sa ilang ordinansa pagdili na sa paggamit sa plastic nga usa sa gitumbok nga hinungdan sa pagkabara sa mga drainage. Bisan unsaon seguro og estrikto sa gobiyerno kun ang mga tawo gahi’g ulo, wala gyu’y mahimo.

Tulo lang ka oras nga ulan nga natunong pa gyud sa buwan sa ting-init, ingon na niadto ang nahitabo. Hinoon, bisan ang PAGASA mihulagway nga dili kasarangan ang rain volume nga ilang na-record nga miabot sa 106 millimeters diin doble kini sa 50 millimeters nga natigom sa kada bulan sa Abril sulod sa 30 ka tuig.

Karon dili na gyud matag-an ang panahon nga mopakugang sa katawhan. Wala’y laing buhaton nato — ang pagpangandam!