Isyu sa kalikupan

Isip taga dakbayan sa Sugbo, mibati ko og garbo nga ang Cebu City gipasidunggan sa Environmental Management Bureau (EMB) sa Department of Environment and Natural Resources (DENR) kay nindot kuno og mga programa ang siyudad kabahin sa environment.

Dako kining hagit ngadto ni Mayor Tomas Osmeña nga palamboon pa niya ang mga environmental programs sa dakbayan, apil niini ang aktibo nga pagpangolekta sa basura, pagpanalipod sa atong kalasangan nga dili maabusohan, ug daghan pa. Kun ako ang pangutan-on, gikuwangan pa ko sa serbisyo sa dakbayan kabahin pagpangolekta og basura kay kanunay man ko nga makakita og mga nagliundok nga basura nga dugay’ng makolekta sa daplin sa mga karsada.

Unya, gihunong na sa City Hall kadtong grupo nga gitugyanan sa pagpanakop sa mga magpataka og labay sa mga sagbot. Kadtong mao nga grupo nga gitawag og City Environment Sanitation and Enforcement Team (CESET) angay’ng padayonon aron pagpitol sa mga tawo nga magpataka lang sa paglabay sa ilang mga sagbot nga makapahugaw sa atong siyudad.

Kadtong mao nga grupo walay kukahadlok nga moisyu og citation ticket ug pagdisiplina sa mga opisyal sa barangay nga magpabaya lang sa ilang katungdanan ug gipasagdan lang ang mga nagpataka paglabay sa ilang basura sa mga publikong lugar.

Kun si kanhi konsehal Nida Cabrera tinuoray nga environmental consultant sa mayor, gitambagan na unta niya si Mayor Osmeña nga mugnaon pagbalik ang mao nga grupo, ug destinohan og tawo nga dili mahadlok nga maoy modumala niini.

Dinhi nga bahina nga nagkuwang si Cabrera sa iyang katungdanan kun tinuod man nga siya maoy environmental consultant sa mayor. Ang iyang gitagad mao ang paghulhog sa mayor nga supakon ang coal-fired power plant nga gustong tukoron diha sa Barangay Sawang Calero. Hisgotan unya nato kini sa ubang mga adlaw.

Isip consultant sa environment, nagpakabana unta si Cabrera kabahin sa giingong ilegal nga pagmugna og sanitary landfill diha sa Barangay Binaliw nga gisugdan sa pag-ugmad bisan og wala pa’y permiso gikan sa kagamhanan. Kini maoy angay’ng tutokan ni Cabrera kay aktuwal na ang paghimo niini sa maong landfill bisan og wala pa’y permiso sa mga ahensya sa kagamhanan, apil na sa City Hall. Si Cabrera maoy gipasidunggan ni Mayor Osmeña nga responsable nga nakadawat og award ang dakbayan gikan sa EMB.

Misinta gud si Konsehal Joel Garganera kay wala makatuo nga na-awarded ang Cebu City kay nakalapas man gani kuno sa balaod og naisyuhan og Writ of Kalikasan dihang mipalabay kini og basura sa Inayawan landfill bisan og milapas na ang termino.

Usbon nako, daghang mahimo nga maayo kun molihok lang ang mga sinaligan sa mayor.