Ang likoy ni Tomas

Daw sama sa giinsister ni Mayor Tomas Osmeña ang pagpadayon sa ilegal nga operasyon sa V-Hire terminal diha sa Barangay Kamagayan bisan pa man og gipasakaan na siya og kasong kurapsyon ni Konsehal Raymond Alvin Garcia sa Ombudsman-Visayas.

Gihulagway sa mayor ang kaso nga gipasaka batok kaniya nga usa lang ka pamolitika. Gitandi usab ni Osmeña ang buhis nga nakolekta sa City Hall gikan sa operasyon sa ilegal terminal ug sa buhis nga gibayad sa 24 ka Banco De Oro nga nag-operate sa Dakbayan sa Sugbo.

Iyang giingon nga kaniadto lang Disyembre, nakakolekta ang City Hall og P446 mil nga buhis gikan sa mao nga terminal ug layo ra kuno kaayo ang gibayad nga buhis sa 24 ka Banco De Oro sa tibook tuig 2015 nga miabot lang og P408 mil. Milikoy ang mayor.

Ang isyu sa terminal sa Barangay Kamagayan dili ang kita nga matigum sa City Hall, kun dili, ang ilegal nga operasyon tungod sa pag-operate nga wala mosubay sa gilatid sa ordinansa nga siya mismo maoy nagpirma kaniadtong 2003.

Kun sakyan nato ang argumento sa mayor, buot ba niyang ipasabot nga uyon ra siya sa operasyon sa gidili nga drugas ug sugal basta mokita lang og dako ang dakbayan sa Sugbo?

Hinuon, sa sumada gusto lang gayud nga ipakita ni Mayor Osmeña nga sa Sugbo siya ang hawod ug walay magbuot kaniya. Mao kini ang akong gituohan nga tinuod nga rason ngano nga iinsister gayud sa mayor ang ilegal nga operasyon sa V-Hire terminal sa Barangay Kamagayan.

* * *

Human makita ni Osmeña ang hulagway ni Apas Barangay Captain Ramil Ayuman diha sa iyang Facebook Account, nga naghinuktok ug gibutangan og caption nga “mobalhin kaha ko no?,” ang mayor dali kaayong nakahatag sa iyang kumentaryo nga dili siya modawat ni Ayuman. Nag-trending ang assuming nga komentaryo ni Osmeña.