Dakong hagit

Daghan ang mirebenta sa dihang gibutyag ni Presidente Rodrigo Duterte dili pa lamang dugay nga ang Sugbo maoy dunay labing dako nga drug rate sa Pilipinas. Ilang giwestiyon ang estatistika nga nakuha sa presidente ug kun unsay iyang gibasihan niini.

Dili makatuo si Gobernador Hilario Davide. Siya nakapangutana kun asa kuno kuhaa ni Duterte ang iyang rekord. Samtang sa iyang bahin, nangayo og eksplinasyon si Mayor Tomas Osmeña kun ngano ang Sugbo maoy numero uno sa problema sa druga.

Apan niining sunod-sunod nga mga operasyon sa otoridad dinhi sa Sugbo, makaingon kita nga dunay basihan ang Presidente sa iyang gipamahayag. Kini tungod kay atong nakita nga halos matag adlaw kining mga pagpangronda batok niadtong nalambigit sa ginadiling druga.

Imbis nga mag-alburoto sila sa maong deklarasyon ni Duterte, mas maayong himuon nga dakong challenge sa mga lokal nga opisyal ang mao niyang pamahayag. Gani,  naghatag pa kadto og dakong encouragement sa kapolisan nga kugihan pa nila ang ilang kampanya.

Dili nato mabasol ang presidente. Iya lamang sigurong gibasi ang mao niyang rekord sa kadaghang nalambigit sa druga nga natiklo sa otoridad dinhi. Ug nagpasabot lamang kini nga paspas ang otoridad paggukod niadtong mga drug dealer ug pusher.

Tungod niining dako nga kalampusan sa otoridad sa Sugbo sa ilang kampanya batok sa druga, dili angay nga magbagulbol pa ang atong lokal nga mga opisyal sa pamahayag sa presidente mahitungod sa dako natong drug rate.

Mas angay hinuon silang magpasalamat sa kapolisan, Philippine Drug Enforcement Agency ug uban pang ahensiya sa gobiyerno sa dakong kalamposan sa krusada batok sa druga dinhi sa dakbayan sa Sugbo ug sa probinsiya.

Gani manghinaut kita nga padayon pa ang subsob nga kampanya aron nga sa katapusan malimpiyo na gayud ang atong lugar gikan niining nalambigit sa ginadiling druga. Mao nang angayan lamang nga atong isipon kadtong dakong deklarasyon sa presidente isip usa ka dakong hagit.