Pag-usab sa apelyido sa bata sa iyang birth certificate

Dear Atty. Divine,

May pangutana ko labot sa akong illegitimate nga anak. Ang bata karon 7-anyos na ug anaa na kini nako kay gitugyan man sa inahan ngari kanako kay naminyo man siya og langyaw. Nagsugod na sa pag-eskwela ang bata ug sa dihang gipangayoan mi og Birth Certificate sa iyang tunghaan, pagkuha nako sa NSO, akong nahibaw-an nga dili akong pangalan ang gibutang nga amahan sa bata sa iyang Birth Certificate, kun dili, ang kanhi kaipon sa inahan sa bata. Tungod niini, ang gigamit karon nga apelyido sa bata mao ang entry nga nabutang sa iyang NSO. Nabutang sab sa Birth Certificate sa bata ang petsa sa kasal sa kunohay iyang parents, bisan kun dili sila kasal. Nagbuwag man gud mi sa inahan sa bata dihang gibuntis pa kining bataa. Karon gusto unta nako nga mausab ang iyang apelyido ngadto na sa akong apelyido ug mailisan sab ang pangalan sa amahan sa iyang birth certificate ngadto na sa akong pangalan. Unsay angayan nako nga buhaton? Daghang salamat. — Alvin

Dear Alvin,

Mahimo nga imong ipausab ang apelyido sa bata sa iyang Birth Certificate, ngadto na sa imong apilyedo, ug mahimo sab nga mailisan ang entry sa father’s name sa iyang Birth Certificate, apan kining maong proseso moagi gyud og korte. Kinahanglan nga imong pamatud-an sa korte nga ikaw ang matuod nga amahan sa bata pinaagi sa DNA test or Paternity test  aron ma-grant sa korte ang Petition alang sa pag-usab sa apelyido sa bata sa iyang Birth certificate. I-apil sab unya sa maong Petition ang pagpa-cancel sa entry sa date of marriage sa iyang Birth Certificate.  Kun may proof ka na nga ikaw ang amahan sa bata, mas maayo nga moduol ka sa imong abogado aron ka magiyahan sa imong legal nga lakang nga pagabuhaton ug aron maandam sab ang Petition ug ang mga dokumento nga angayan nimo nga ipresentar sa korte. Thanks and God Bless! —Atty. Divine