Druga sa prisohan

Lisod na nga masilhig pa ang negosyo sa ilegal nga druga sa atong mga bilanggoan. Kun atong basihan ang kaso didto sa National Bilibid Prison, morag sa sulod mismo sa prisohan mahitabo ang dagkong mga deal sa druga dinhi sa nasud.

Bisan dinhi sa Sugbo gikatahong padayon kining payuhot sa druga sulod sa mga prisohan. Ambot ngano nga makasulod pa kining maong klase sa kontrabando nga unta wala man magkulang og mga guwardiya kining mga bilanggoan.

Apan dako akong pagduda nga adunay konsabo kining mga tigpayuhot og druga diha sulod sa mga selda. Ug kini walay lain kondili mismo ang mga guwardiya kinsa anaa sa payola sa mga natanggong nga mga drug dealer ug pusher.

 Kining akong pagduda basi usab sa mga panghibato didto sa NBP, sa Cebu Provincial Detention and Rehabilitation Center ug Cebu City Jail diin nahimong kontrobersiya gumikan sa naghitak nga negosyo sa    druga.

 Gani sa niaging mga adlaw, gironda pag-usab ang CPDRC sa otoridad. Tuod man daghang kontrabando ang nakuha sa joint operation sa kapolisan, militar ug Philippine Drug Enforcement Agency. Gawas sa ginadili’ng druga, daghang cellular phones ug kwarta ang ilang nasakmit usab.

 Tungod niini, gipalagpot ni Gobernador Hilario Davide ang warden sa maong pasilidad. Bag-o pa lamang ang maong warden sa maong bilanggoan apan nasikwate kini gumikan kay wala kini nakasulbad sa maong problema.

 Nganong nakasulod kining mga ilegal nga druga sa maong bilanggoan? Mao kini ang dakong pangutana karon. Apan dili na ikatingala pa kun daghan sa mga guwardiya ang mismo kakunsabo sa mga drug dealer ug pusher nga nagtingkagol karon diha sa maong prisohan.

 Gumikan lagi usahay sa ka dako sa kantidad nga itunol kanila, dili ikalimod nga dali ra nga masilaw kining mga jail guards sa salapi nga itingal kanila sa mga binilanggo kinsa nalambigit sa ilegal nga druga.

 Gikinahanglan ang tinud-anay nga paglimpiyo diha sa atong mga bilanggoan. Dili lamang pinaagi sa pagputol sa komunikasyon ngadto sa gawas sa mga nalambigit niini kundili ang pagsilhig usab sa mga bugok nga mga guwardiya.