Mga remedyo sa ngipon nga nagsakit (1)

Dili lalim bation kun magsakit ang atong ngipon. Pastilan gyud, makasipok ang kasakit nga mura’g gibarinahan ang atong ulo. Busa atimanon pag-ayo nga mamintin ang kahimsog sa ngipon pinaagi sa husto nga pagpanipilyo.

Likayan ang pag-toothbrush sa ngipon nga bag-ohay lang nakahigop o nakakaon og init. Palabya una ang 30 minutos sa dili pa manipilyo, aron dili mangagabok ang ngipon.

Sagad sa makadaot o makapadunot sa ngipon mao ang pagsige’g kaon o pag-ugom og karmelitos (candy). Kulang sa calcium ug ang paggamit sa flouride toothpaste nga mohilis sa enamel nga proteksyon sa ngipon.

May daghan na karon nga herbal toothpaste diha sa merkado nga mas maayong gamiton.

Kun dunay daot o bangag ang ngipon nga lawom na, ayaw na paabunohi o papastahe o kaha magpa-root canal aron permanente mawagtang na ang panakit sa ngipon, apan mahurot sab ug dali magabok o mapudpod ang mga ngipon, gumikan sa toksik nga kemikals nga gibutang o gi-injection sa ngipon.

Mas maayo ipaibot, unya pabutangan og ‘brace’ ug ‘prosthetic insert’ o pustiso.

Kun dili malikayan nga magsakit ang ngipon, naay daghang remedyo niini nga nasulayan na sa uban nga epektibo, sama sa mga mosunod;

* Clove oil — Maglingin og gamay’ng gapas nga butangan og clove oil nga ibutang sa bangag, dayon paslaki’g uga nga gapas. Halang nga bugnaw kini, pasagdi nga maglaway, ayaw tunla nga inanay pugngan ang pagginhawa sa makadiyot, kay taudtaud niana mawala ra ang kasakit.

* Vanilla extract —Pagkuha og “cotton swab” nga ituslob sa vanilla extract, dayon direkta nga butangan ang bangag sa ngipon ug paslaki’g gapas. Dili magdugay inanay nga mobahar ang makaugtas nga panakit sa ngipon, nga usahay dili kita makatarong sa pagkatulog.