Brgy Poblacion, Cordova, Cebu

“Mamalihug mi sa kapolisan diri nga tukhangon unta nila luyo sa merkado kay naay namaligya’g shabu. Ang nakapait kay kun naay mopalit og shabu, mga bata man maoy ilang sugoon pagpakuha sa shabu.”

Brgy Garing, Consolacion, Cebu

“Naunsa na man ni ang mga polis nga wala man gyud makadakop niining nagsige’g hantak diri kada Sabado. May namaligya pa og shabu diri nga wala gyud madakpi.”

Brgy Pusok, Lapu-Lapu City

“Diri sa Seaweeds dapit kay migamay na ang dalan kay gisakop na man sa ubang mga tindahan. Misamot pa gyud kagamay kay ang ubang sakyanan anaa na magparking, lisod na ang pag-agi sa mga tawo.”

Brgy Buanoy, Balamban, Cebu

“Naunsa na man kining mga opisyal namo sa barangay nga wa may aksyon sa mga magbuntagay pagkanta sa videokehan. Kaming mga nagpuyo sa duol kay maoy mahasol, labi na ang adunay mga trabaho kay inig ka buntag halos wa’y katulog.”

Brgy Luz, Cebu City

“Magpatabang unta mi diri dapit sa Sitio Mabuhay kay nahasol gyud ang mga tawo tungod sa giparking nga mga sakyanan, ug mga manindahay og barbecue nga nagbutang pa gyud og mga lingkuranan sa karsada. Dugangan pa nga naay chop-chop nga awto nga naa ra gibutang sa daplin.”

Brgy Pajo, Lapu-Lapu City

“Sa luyo sa namaligya’g balloon, naay suyopanan sa usa ka compound kay naa man dihang dapita ang namaligya’g shabu. Ang among nahadlokan kay bisan kinsa ra nga tawo ang mosulod diri.”

Brgy Babag 2, Lapu-Lapu City

“Ang akong reklamo mao ang dili maayong pagpanghatag og cash assistance sa mga senior citizens, kay ang madawat unta nila P3 mil matag usa, pero ang gihatag kanila sa taga barangay tag P2,820 ra man.”

Brgy Cabalawan, Sogod, Cebu

“Ireklamo namo ang midwife nga nadestino diri sa barangay kay grabe kaayo mangasaba sa mga buntis nga inahan, pakauwawan man hinoon. Naa pay mga tambal diri nga libre unta pero ipanghatag nila kanang hapit na mo-expire.”

Brgy Sandayong Sur, Danao City

“Diri sa among dapit kun mag-uwan, maglisod gyud og labang ang mga tawo tungod sa kakusog sa baha latas sa karsada. Kuyaw kaayo sa mga tawo labi na sa mga estudyante.”

Brgy Tejero, Cebu City

“Naunsa na man intawon ning luyo sa Blessed Sacrament Church, wala man gyud masumpo ang ilegal nga drugas nga unta puwerte na man kadaghan sa mga adik ug mamaligya og shabu. Naa pa gyuy drug den diri nga kasagaran sa ilang mga parokyano mga drivers sa PUJ ug taxi.”

Brgy Tacpao, Guihulngan City, Negros Oriental

“Ang karsada gikan sa Bolado paingon diri sa among barangay kay putol-putol ang semento lisud gihapon kaagian sa mga sakyanan, labi na sa mga motor. Mas maproblema mi labi na kun mag-uwan kay daghang madisgrasya sa mga motor.”

Alang sa inyong mga reklamo text, lang sa 09326425494