Brgy Lawaan, Talisay City

“Ngano man nga ang mga sakop sa CCTODA kusog kaayo manakop sa mga traffic violators labi ang illegal parking, pero wala man sila makadakop sa mga tagdumala sa KEN Taxi nga naa gipangparking ang ilang mga sakyanan daplin sa karsada?”

Brgy Mactan, Lapu-Lapu City

“Problema namo ang nagpadayong pagpamaligya og shabu diri sa Sea Breeze Homes, daghan man gihapon ang pushers diri. May nadakpan na man unta nga dakong balyena diri tungod sa pamaligya’g shabu pero naa pa may namaligya.”

Brgy Tabunok, Sogod, Cebu

“Diri sab sa Sitio Suba daghan gihapon ang namaligya’g shabu ug wala gyud dakpa sa mga polis nga ilado man unta sa kadaghanan ang maong mga pushers. Imposible kaayo nga wala kaila ang mga polis niining mga tawhana.”

Brgy Danlag, Consolacion, Cebu

“Ireklamo lang unta namo ang mga drivers sa mga dumptruck nga mag-agian diri sa among lugar kay abusado kaayo, dili gyud mohatag og lugar kun naay motor nga ikasugat. Daghan na intawon nga mga motor ang nadisgrasya diri tungod kay matagak na lang sa karsada kay dili man mopadaplin ang dumptruck.”

Brgy Ilihan, Toledo City

“Ako lang ireklamo ang computeran diri dapit sa amoa sulod sa Sitio Riprap kay ang mga bata paduwaon nila bisan og oras nga tingklase. Maayo unta og mabadlong ang tag-iya sa computeran kay daghan na nga mga ginikanan nagbagulbol kay ilang mga anak dili na magtuon.”

Brgy Maya, Daan Bantayan, Cebu

“Diri sa Sitio Tagasa daghang ginikanan ang nangutana kun gi-require ba gyud sa mga maestra o sa DepEd nga kami maoy pagunahon ug patamnon sa eskuwelahan. Kun dili kuno mi moapil, hagbongon sa ilang mga grado ang among mga anak.”

Brgy Lipata, Minglanilla, Cebu

“Ang among karsada diri kay grabi na kadagko sa mga lungag gikan sa Vaking hangtod sa Villa Mangga. Tungod kini sa mga dagkong truck nga mag agian diri ug walay nahimo ang taga barangay, mura’g naay nagdawatan og talay.”

Brgy T. Padilla, Cebu City

“Nabalaka gyud ko pag-ayo sa grabeng kinawatay sa kuryente diri sa Villagonzalo-1, dapit sa Pier 4. Manghinaot mi nga mahatagan dayon ni og dinalian nga pagtagad aron dili na mi mabalaka sa among kahimtang diri.”

Brgy Sambag 1, Cebu City

“Maayo unta og mabadlong kining naninda og saging ug isda sa may Sitio Cawayan, atbang gyud sa Petron Gas Station matag gabii kay maglisod nami pag-agi kay naa na man siya sa dalan namaligya. Wa man unta’y manghilabot sa ilang pagpaninda basta dili lang sila makababag sa karsada.”

Alang sa inyong mga reklamo text lang sa 09326425494