Di ka-ehersisyo unsay remedyo (2)

Kasumpay sa unsa’y buhaton nga remedyo kun dili gyud makahigayon sa pag-ehersisyo, ania, atong ipadayon.

* Kun kanunay ka nga maglingkod sa trabaho mo, mobarug ka kada oras, sud sa 5 ka mins, palihoka ang tanang parte sa imong lawas. Iliraw ang mga mata sa palibot ug ikipat-kipat nga hapyuron ang ubos ug ibabaw sa mata nga magpiyong ug bukhon nga pulihon-pulihon pagkidhat (pangrelaks kini sa mata). Kun makalantaw ka sa gawas mas maayo nga imong kipat-kipaton.

* Kun maglingkod gani, iaktibo kanunay nga dili i-permi ang posisyon, palihukon gyud kay bikogan ka nga mogahi ang kaunoran ug kabukogan. Ang tiil usab palihoka nga mura’g moduyog sa musika. Himason panagsa ang bagtak, para makalihok normal ang sirkulasyon sa tiil ug paa. Ang lawas ayaw itara nga permi nakasandig, kay manakit ang likud.

* Kun trabaho mo, magsige’g lakaw-lakaw maayo man, apan kalma lang kay maugtas ang imong kalawasan. Dili sab maayo nga masubraan nga maekspos direkta sa adlaw. Higopon ang nutrens sa lawas, igo na ang 5-10 minutos, ayaw sa oras nga 10 am -2 pm, kay makadaot kini sa panit (skin ulcer), kun masubraan sa adlaw. Dili sab pinahagtok/pina-ambak maglakaw kay madaot o maugtas ang tuhod ug delikado matakilpo nga mabun-og ang depensa nga tisyu (cartilage) sa panuhod, monipis maong mosakit nga dakpon dayon sa artraytis. Inom permi og daghang tubig.

* Sa unsa may buhaton, himoa kanunay ang husto nga pagginhawa,  mohanggap og preskong hangin sa palibot sa mga tanom o sa mga plaza. Kini aron pirme ug abunado ang lawas sa hangin (oxygen) aron pag-epekto nga himsog ang lawas.