Managlahi nga liderato

Ning pagsugod sa Bag-ong Tuig, mapasundayag ang usa sa dili malalis nga mga timaan sa dakong kalainan sa mga liderato nilang Presidente Rodrigo Duterte ug sa iyang gisundan nga si kanhi Presidente Noynoy Aquino: Gitakdang sugdan na pagpatuman karong buwana ang pasiunang umento sa pension sa Social Security System (SSS).

Samang umento ang gisugyot sa niaging tuig atol sa pamunoang Aquino. Apan lahi ni Duterte, gisalikway ni Aquino ang umento. Gi-veto niya ang balaudnon nga napasar sa House of Representatives ug sa Senado ug ang mayoriya sa mga magbabalaod nga alyado niya nitalaw sa pagsapaw sa iyang veto ug pag-insistir sa ilang baruganan.

* * *

Ang kalainan nila ni Duterte ug Aquino mas mabantang kay managsama ang mga baruganan sa Kongreso ug sa finance managers sa Malakanyang sa duha ka nagsunod nga pamunoan:

Ang Kongreso nipasar og balaudnon pagpatuman og P2,000 nga umento sa pension sa SSS sa niaging administrasyon ug gisubli ang samang baruganan pinaagi sa joint resolution sa niaging buwan.

Samtang ang mga kalihim sa DBM, DOF ug NEDA pulos nipasidaan nga ang pagpatuman sa umento sa pension makapa-basiyo sa pundo sa SSS, ug busa mameligro nga dili na hinuon makadawat og bisan usa ka sentimon nga benepisyo sa pag-retiro unya sa nagtrabaho pa karong mga sakop.

* * *

Ang mga sakop sa duha ka nagsunod nga Kongreso, klarong namolitika: Gipasar ang P2,000 nga umento sa pension sa Enero sa niaging tuig aron pagpahumot sa mga botante sa nag-angat nga piniliay sa Mayo 9 ug bisan sa sukwahi nga kuwentada sa SSS ug finance managers gibanhaw ang samang balaudnon sa niaging buwan aron pagdason sa saad ni Duterte sa niaging kampanya.

Samang mga numero nga gigamit niadto nila ni kanhi Finance Secretary Cesar Purisima ug kaubanan sa niaging pamunoan mao ra say gigamit karon nilang Finance Secretary Sonny Dominguez ug kaubanan sa pagtuki sa kontrobersiya sa gabinete ni Duterte.

* * *

Si Aquino nipili pagdason sa baruganan sa iyang finance managers ug gibalibaran ang pamolitika sa iyang mga alyado. Wa siya matandog bisan sa pangilaba sa kabus nga pensioner sa SSS kansang P2,000 nga binuwan nga pension kuwang sa inadlaw’ng tambal ug pagkaon.

Sa iyang bahin, si Duterte nihangop sa pagdason sa iyang mga alyado sa Kongreso apan naminaw sab sa iyang finance managers. Wa pa mahuman ang lalis sa gabinete apan nipasumbingay na si Duterte nga mahinayon gyud ang umento apan aron dili mabangkarota ang pundo mahimong usbawan ang binuwan nga SSS premium.

Nahibawo si Duterte nga mokisikisi ang nagtrabaho pa nga mga sakop sa SSS apan may igo siyang politikanhong puhonan sa pagduso sa mas dakong bayranan bugti sa iyang gisaad nga mas dakong pension.

([email protected])