Makaduda ang survey

Ang survey, scientific, mao nga motuo ko kay motakdo man gayud ang resulta niini. Sama sa election survey nga gihimo sa Social Weather Stations (SWS) ug Pulse Asia diin ang resulta sa ilang survey gikonpirmar gayud sa resulta sa piniliay. Kaniadtong 2010, nag-una si Noynoy Aquino ug Jejomar Binay sa mga kandidato sa pagka presidente ug bise presidente, dayon gisundan sila ni Erap ug Mar Roxas.

Paghuman sa iniphanay, migawas nga mananaog sa piniliay sila si Noynoy Aquino ug Jejomar Binay, ug gisundan sila nila ni Erap ug Mar Roxas. Bisan ang mga kandidato sa pagka senador mitakdo usab ang resulta sa survey, sa resulta sa piniliay. Sa nasudnong piniliay karong tuiga, mitakdo gihapon ang resulta sa survey sa resulta sa election. Si Presidente Duterte nga nag-una sa mga survey nga gihimo mao gayud ang midaog.

Bisan tuod 1,200 ra ka tawo sa 50 milyones kapin ka botante ang gipangutana sa taga SWS ug Pulse Asia, pero mao gayud ang migawas nga resulta. Ingon niini ka scientific ang survey, mao nga motuo gayud ko og survey.

* * *

Apan sa survey nga gihimo aron mailhan kun unsang sibyaanan dinhi sa Sugbo ang pinaminaw, ingon sa dili katuohan kay dili man pareha ang resulta. Sa survey sa A.C. Neilsen, ang DySS Super Radyo ang migawas nga numero uno sa AM, ug ang 99.5 RT FM ang numero uno sa FM. Pero sa survey nga gihimo sa Kantar, ang DyHP mao ang migawas nga numero uno sa mga AM station sa Sugbo, samtang sa survey nga gihimo sa RRC ug KBP maoy migawas nga numero uno nga FM station ang Brigada News FM. Naglibog ko ug nagduda sa resulta sa survey sa radyo.

Wala kaha’y binuang nga gihimo sa survey sa mga sibyaanan? Kay kun wala pa’y binuang sa gihimong survey, magkapareho unta ang resulta nga gihimo sa A.C. Neilsen, Kantar ug RRC/KBP sama sa election survey nga gihimo sa SWS ug Pulse Asia.

 Akong sugyot sa mga survey agency sa radyo nga magtarong sa ilang pagahimoong survey mentras tanto nga motuo pa nila ang mga advertisers nga maoy nag-una nila nga kliyente.