Dakong buhi ang mga biktima sa Martial Law

Nalubong na ang patay’ng lawas sa kanhi diktador Ferdinand Marcos sa Libingan ng mga Bayani bisan pa man sa pagsaba-saba ug pangusog sa mga biktima sa pag-abuso panahon sa Martial Law, unsa kahay mosunod nga mahitabo?

Daghan ang nag-ingon nga kinawat-kawat ang paagi sa paglubong.

Karong nalubong na siya mag-agi sa buslot sa dagom ang mga tinguhang ugkaton kini pagbalik. Dako  kining gubot.

 Apan daw dili kini mahitabo samtang si Duterte pa ang  presidente  kinsa dayag kaayo sa iyang baruganan nga malubong  si Marcos aron mahunong na kining pagkabahin-bahin sa mga Pilipino tungod sa Martial Law.

Sayon ra siguro ni alang niadtong wala direktang nabiktima sa Martial Law dili sila maoy gipaantos kaniadto.

Kining mga nahibiling buhi nga biktima sa Martial Law  nga nisupak ug nagmartsa karon aduna nay  mga anak ug mga apo.

Ang uban mao ang mga nailo sa mga nakigbisog kaniadto batok sa Martial Law.

Busa dili husto nga moingon ta nga: “Naghilas-hilas lang nga wala man na sila kaniadto. Kining mga nagtingog-tingog karon wala pa gani matawo kaniadto sa panahon sa Martial Law.”

Kining mga nagtingog karon direktang naapektahan emosyonal ug panghunahuna kaniadto.

Sila kadtong mga batang gagmay pa nga gihikawan sa gobiyernong Marcos nga makauban ilang ginikanan diha sa ilang panimalay matag adlaw ug gabii.

Sila kadtong mga kaniadto nagkinahanglan sa ilang mga amahan o inahan nga  gipangsikop sa mga sundalo ug  mga sakop sa Philippine Constabulary tungod sa ilang pagkakritiko ni Marcos.

Sila kadtong mga kabataan nga nagutman sa oras tingkaon, nahunong ang pagtungha, nalisang ug gikinahanglang mobalhin og pinuy-anan, naguba ang kaugmaon, kay ilang amahan ug inahan atoa sa prisohan, o ba kaha gidala sa mga otoridad sa lugar nga wala nila masayri.

Dili baya tanang biktima sa human rights abuses kaniadto mga adunahan, impluwensyado ug ang uban dili man gani siguro militante o kritiko ni Marcos, biktima lang gyud sila sa mga abusadong kasundalohan ug konstabularya ilabi na diha sa mga hilit nga kalungsoran ug barangay.

Ang uban sa mga nitingog batok ni Marcos gipangsikop ug wala na igkita karon ug gitawag na nga mga desaparicidos.

Dili lalim ang pag-antos sa mga kabanay niining mga desaparicidos nga hangtud karon, bisan na lang unta og patay’ng lawas na lang ilang nabawi mapahiluna na ilang huna-huna kay makadagkot pa sila og kandila matag panahon sa kalag-kalag.

Dili tinuod nga wala na kining mga biktima sa Human Rights Abuses sa Martial Law, kun buot hunahunaon mas nidaghan pa sila karon.

Malisod na kun ugkaton pa pagbalik si Marcos gikan sa LNMB tungod sa kataas pa sa proseso.

Apan kinahanglang magpabilin ang kagawasan ug demokrasya sa Pilipinas ug dili na mabalik pa ang diktadoryang rehimen.  Angay hinumdoman  dili tanang makaayo para usa ka lider makaayo sa tibuok nasud.