Over ra ang reaksiyon

Daghan ang nakugang sa advisory sa embahada sa Estados Unidos nga nag-warning sa mga Amerikano nga nia sa Pilipinas mahitungod sa kakuyaw sa mga lugar sa southern Cebu tungod kuno sa mga hulga sa pagpangidnap sa mga terorista.

Ginganlan sa maong advisory ang mga lungsod sa Dalaguete ug Santander ug ang tourist island sa Sumilon isip mga lugar sa probinsiya nga target sa mga bandido kinsa nagplano kuno nga mangidnap og mga foreign nationals.

Ambot unsang klaseha sa taho ang nasagap sa US Embassy nga nahimo man nga target ang maong mga lugar sa mga terorista. Kay sa atong nahibaw-an, malinawon man kining mga lugara ug  nga wala pay usa ka kaso sa pagdagit sa mga turista ang natala sa mga resort didto.

Hinuon dili nato kapugngan ang ubang kanasuran nga moisyu og ingon niini nga klase sa warning. Apan klaro gayud usab nga wala utingkaya sa US Embassy ang kabalido sa taho nga nadawat niini mahitungod sa giingong risgo sa pagbisita sa          southern Cebu.

Haskang layoa ra sa Sugbo gikan sa padayong gubot didto sa Mindanao. Gani bisan pa sa kagubot didto, padayon ang pagsulbong sa industriya sa turismo sa atong lalawigan, diin naila na nga usa sa nag-unang tourist destination sa nasud.

Sa gihingusgang kampanya sa militar batok sa mga bandidong Abu Sayyaf didto sa Sulu ug Basilan, makahunahuna pa kaha ang mga terorista paglawig nganhi sa Sugbo aron lamang pagdagit og mga turistang langyaw? Dili siguro.

Siguro over ra kaayo ang reaksiyon sa mga kadagkoan sa maong embahada. Ug nga ilang giseryoso ang mga taho sukad pa kaniadto nga adunay mga sakop sa Abu Sayyaf ang nakasulod na kuno dinhi sa Sugbo hinungdan sa ilang pag-isyu sa maong advisory.

Bisan pa man niini, angay lamang usab nga pahugtan pa sa otoridad ang siguridad sa mga tourist spots ning lalawigan. Bisan pa man sa dili kumpirmado nga  taho sa mga terorista nga giingong ania dinhi, angay lamang usab natong ipakita nga prayoridad sa otoridad ang siguridad sa mga turista sa probinsiya.