Kaalimuot sa Amihan
Human giunos ang Nobiyembre 1, nga nakapabaha sa pipila ka menteryo ug nakapalupad sa gagmay’ng mga tulda nga wa mahigot ug nakabasa sa daghang nangalagkalag, gibalikosan sa labing kaalimuot ang Nobiyembre 2.
Nga ang mga niduaw sa nitaliwan nilang mga minahal sa kinabuhi, bisan tingtrabaho na ang ikaduha ug kataposang adlaw sa kalagkalag, nagtabisay ang singot samtang napul-an og pamaypay.
Dili gamay nila ang nakapangutana, hain na man ang amihan? Hain na man ang gipasalig nga pagbanos na sa bugnaw nga hangin human hingpit na nga nibiya ang bugnaw nga hanging habagat? Nalangay ba lang ang tingtugnaw? O lisud na gyud nga agpason ang kahimtang sa panahon tungod sa global warming?
* * *
Niangkon ang kadagkoan sa Philippine Atmospheric, Geophysical and Astronomical Services Administration (PAGASA) nga may sukaranan ang sibaw nga tiyabaw sa kaigang. Kay nakasukod sila og mas taas nga temperatura sa unang tulo ka adlaw ning ting-amihan na unta nga Nobiyembre kay sa nabatyagan sa katawhan sa gihabagat pa nga buwan sa Oktubre.
Nipasabot sila nga wa pa motidlom ang temperatura bisan sa pormal na nga pagbanos na sa amihan kay wa pa magsugod ang winter sa mainland China ug sa Siberia. Kansang bugnaw kaayong hangin maoy gipaabot nga manuhut-suhot sa tibuok nasud, apil na sa Sugbo ug Kabisay-an, human sa grabeng kainit sa El Niño ug sa habagat.
* * *
Nipasalig ang PAGASA nga moabot na gyud ang gikahinaman nga tingtugnaw sa sunod buwan. Gikatakdang molungtad og tulo ka buwan ang tingtugnaw gikan sa Disyembre karong tuiga hangtod sa Pebrero sa sunod tuig.
Sa ato pa, gamay na lang gyud nga agwanta ug hingpit na ta nga manamilit sa mga paypay ug magsugod na og pangukay sa hagbay ra nga natipigan nga mas baga nga mga igsusul-ob. Mas mahinungdanon ang pagkatinuod sa mga panghinaot nga malaslasan ang nagbuntaog natong mga bayranan sa kuryente kun dili na unya magsige og paandar sa atong electric fans ug airconditioning units.
* * *
Apan dili lunlon maayong balita ang dala sa amihan. Subling nipasidaan ang kadagkoan sa PAGASA nga ang amihan makapabira sab paubos sa umaabot nga mga bagyo. Mas dako na ang kahigayonan nga ang nahibiling mga bagyo sa kataposang duha ka buwan ning tuiga makaigo sa Sugbo ug sa Kabisay-an ug sa Mindanao.
Maayo na lang nga ang low pressure sa niaging semana nga nagsugod sa Davao ug nisaka sa Surigao nahilis sa wa pa moabot sa ato sa Kabisay-an. Ang nisunod nga bagyong Marce nagsugod sa ibabaw sa Sugbo, natungod na sa silangang Luzon.
Laing nag-ung-ong nga bagyo nga tawgon og Nina gitakdang mosulod sa Philippine Area of Responsibility (PAR) karong semanaha agi sa mas ibabaw pa gyud nga bahin sa Luzon.
- Latest
