Nadisgrasya atol sa trabaho

Dear Atty. Divine,

Niadtong Mayo 3, 2014, nadisgrasya ko gikan nga nangolekta ug padulong na sa office. Regular ko sa akong trabahoan ug during office hour gyud ko nadisgrasya .Nag-start ko og trabaho from 2008 to 2014.

Hangtod karon wala na gyud ko makabalik og trabaho kay dili na nako kaya attorney tungod sa akong sitwasyon kay hangtod karon nag- crutches lang gihapon ko kay sa left leg man ang akong fracture ug dili na molihok ang akong tiil, usa sab namubo siya ug nigamay nga mura’g polio tan-awon.

Tungod niini miduso ko og resignation letter niadtong Hulyo. Ang akong pangutana attorney, makapangayo ba ako og separation pay kay voluntary resign ra ba ko? Pero nihangyo ko sa office ug gamay lang unta nga pahalipay pero wala may response . May obligasyon ba ang opisina nako? Daghang salamat. — Cris

Dear Cris,

Kun ikaw regular nga trabahante sa maong kompaniya mahimo ka nga  mo-avail sa Permanent Disability Benefit sa SSS tungod sa imong sitwasyon karon nga naglisud ka na sa paglakaw human madisgrasya sa trabaho.

Ang SSS mohatag og pension sa mga empleyado nga na-disable ug dili na makatrabaho pag-usab sama sa nahitabo kanimo. Lain nimo nga option mao ang pagdangop usab sa Department of Labor and Employment tungod sa circumstances nga nadisgrasya ka atol sa trabaho, duna man kita’y gitawag og Employees’ Compensation Fund or program, busa mas maayo nga moadto ka sa DOLE aron magiyahan ka og unsaon nimo sa pag-avail ang maong programa.

Ang imong employer obligado nga motabang kanimo aron maka-avail ka sa maong mga benepisyo. Hinuon kun ang imong pag-resign ang basehan, dili ta makapugos sa employer sa paghatag kanimo og separation pay kay voluntary man ang imong pagbiya. Apan tungod sa rason nga nadisgrasya ka atol sa imong pag-perform sa trabaho ug na-disable ka ug dili na ikaw makatrabaho pag-usab, kana maoy imong basehan sa pag-avail sa SSS ug sa Employees’ Compensation.

Mas maayo nga imong bisitahon ang SSS ug ang DOLE kalabot sa imong problema. Thanks and God Bless. - Atty. Divine

Alang sa inyong pangutana, ipadala lang sa Legal Corner sa Banat News sa V. Gullas St., Cebu City or email sa [email protected] ug akong tubagon ang inyong pangutana pinaagi sa akong column matag Miyerkules, Sabado ug Domingo.