Laing “teka-teka” ni Mar?
Dihang nabisto nga wa kasumiter si kanhi Interior Secretary Mar Roxas sa iyang statement of contributions and expenditures (SOCE) ug nga siya ray kandidato pagka presidente nga napakyas pagtuman sa panginahanglan nga gitakda sa Commission on Elections (COMELEC), nisantop dayon sa akong hunahuna nga mahimong mobiya na siya sa politika--di na modagan ni magpatudlo og bisan unsang katungdanan sa gobiyerno.
O tingali sukwahi sa pagdawat sa iyang kapildihan ug panghinaot sa kalampusan ni President-elect Rodrigo Duterte gisakitan pag-ayo sa ikaduhang sunudsunod niyang kapildihan--pagka bise presidente sa 2010 ug pagka presidente sa 2016. Ug ang padayong pagbugalbugal ni Duterte niya wa makaalim, hinunoa nakawiwi, sa lab-as pang samad.
* * *
Apan dihang nangayo si Roxas og lugway sa COMELEC, kay wa diay maandam ang iyang SOCE sa gitakdang panahon tungod sa kadaghan sa mga dokumento nga kinahanglang pakopyahan ug ipataban, nalab-as ang mga pasangil sa niaging kampanya sa “teka-teka” niyang liderato.
Nisamot pa gyud dihang nabisto nga hasta ang Liberal Party (LP) nga gipangulohan ni Roxas wa sab kasumiter sa SOCE sa gitakdang panahon. Tinuod ba diay ang pasangil nilang Bise Presidente Jejomar Binay, Senador Grace Poe ug Duterte nga langayan ug tapulan ang liderato ni Roxas di lang sa nagkalainlaing katungdanan nga nahuptan kun dili hasta na sa pagkuwenta sa iyang kaugalingong gasto sa kampanya?
* * *
Ang makauuwaw’ng bulilyaso ni Roxas ug sa LP maoy komplikasyon nga wa kinahanglana. Gawas nga lisod tuohan nga kuwang ang usa ka buwan nga lugway sa COMELEC sa pag-andam sa SOCE, daghang maangin sa klarong pagpabaya sa yano ra gyod untang gimbuhaton.
Usa na si Vice President-elect Leni Robredo. Nga kun higpit nga ipatuman sa COMELEC nga di kaasumir ang mga nidaog sa niaging piniliay kun wa kasumiter sa SOCE ang ilang mga partido, mahimong mahikawan sa bunga sa tam-is nga kadaogan sa pakigbisog pagpugong sa pagbalik sa gahom sa anak sa kanhi diktador--ang pagbanos sa ikaduhang labing taas nga katungdanan sa nasud.
* * *
Maangin sab silang Cebu Governor Junjun Davide ug kinabag-an sa lokal nga mga opisyal nga nidaog ubos sa LP. Inay motutok sa mga gimbuhaton sa pag-asumir sa gahom o pagsilbi sa laing termino karong Hunyo 30, mapugos sila pagpaabot sa hukom nilang COMELEC Chairman Andres Bautista ug kaubanan nga motuki sa mga sukaranan sa mga argumento sa mga abogado sa LP:
Nga makiangayon ang 14 ka adlaw nga lugway pagsumiter sa SOCE;
Nga kuwestiyonable ang legalidad sa kamandoan sa COMELEC nga di na modawat og SOCE lapas sa Hunyo 8; ug
Nga unconstitutional ang mga probisyon sa Republic Act 7166 ug Comelec Resolution 9991 nga nagdili sa mga mananaog pag-asumir sa katungdanan kun sila ug ang ilang partido di kasumiter sa SOCE.
- Latest
